Prezıdent elimizde basymdyq berilip otyrǵan áleýmettik salalarǵa toqtaldy, - dep habarlaıdy Dalanews.kz.
– Bıyl «Aýylda densaýlyq saqtaýdy jańǵyrtý» ulttyq jobasy aıasynda 115 jańa medısına nysany salyndy. Otandyq medısınada emdeýdiń ınovasıalyq ádisteri engizilip, onkologıalyq qyzmetti keshendi jańǵyrtý jumystary bastaldy. Sala qyzmetkerlerin quqyqtyq jáne qarjylyq turǵydan qorǵaý týraly zań qabyldandy. Bul – atalǵan mamandyqtyń mártebesin arttyrýǵa baǵyttalǵan qadam. Osy jáne basqa da júıeli sharalardyń nátıjesinde negizgi medısınalyq-demografıalyq kórsetkishterdiń jaqsarǵany baıqalyp otyr. Ortasha ómir súrý uzaqtyǵy Táýelsizdik jyldarynda alǵash ret 75 jastan asty. Urpaqqa sapaly bilim berý – mańyzdy mindet. Elimizde «Jaıly mektep» ulttyq jobasy qolǵa alyndy. Sonyń arqasynda 500 myńǵa jýyq bala jańa bilim ordasynda oqıtyn bolady, – dedi Qasym-Jomart Toqaev.
Memleket basshysy ǵylymy jáne tehnıkasy damyǵan elderdiń álem kóshin bastap turǵanyn tilge tıek etip, osy úderisten qalmaý úshin tehnokrat ult bolýymyz qajet ekenin alǵa tartty.
– Bul – ýaqyt talaby. Keler jyldy «Jumysshy mamandyqtary jyly» dep jarıaladyq. Biz tehnıkalyq jáne kásiptik bilim berýge basa mán berip otyrmyz. Bıyl osy salaǵa arnalǵan memlekettik tapsyrysty edáýir kóbeıttik. Grant sanyn 10 myńǵa arttyrdyq. Memlekettik tapsyrystyń 65 paıyzy tehnıkalyq mamandyqtarǵa bólindi. Elimizde sheteldiń bedeldi joǵary oqý oryndarynyń fılıaldary ashylyp jatyr. Bilim-ǵylymnyń sapasyn jaqsartýǵa qatysty basqa da sharalar qolǵa alyndy. Jaqynda «Ǵylym jáne tehnologıalyq saıasat týraly» zań qabyldandy. Munyń bári básekege qabiletti ozyq ult bolýymyz úshin óte mańyzdy dep oılaımyn, – dedi Prezıdent.
Qasym-Jomart Toqaev bıyl óziniń bastamasymen «Taza Qazaqstan» aksıasy bastalǵanyn, bul halyqtyń ekologıalyq mádenıetin kóterýge arnalǵan jalpyulttyq joba ekenin atap ótti.
