"Qazaqstan prezidenti Qasym-Jomart Toqaev Aýǵanstanda qalyptasqan jaǵdaiǵa bailanysty kesheli beri ekinshi ret jiyn ótkizdi. Jiynǵa premer-ministr Asqar Mamin, ulttyq qaýipsizdik komiteti, syrtqy ister, qorǵanys, ishki ister, tótenshe jaǵdailar ministrlikteri, bas prokýratýra, memlekettik kúzet qyzmeti basshylary men qaýipsizdik keńesiniń hatshysy qatysty", - dep habarlady prezidenttiń baspasóz hatshysy Berik Ýáli.
Jiyn barysynda Aýǵanstan Islam Respýblikasyndaǵy jaǵdaiǵa bailanysty shuǵyl áreket etý sharalary jáne Qazaqstan azamattarynyń qaýipsizdigin qamtamasyz etý máseleleri talqylandy. Osy oraida Qazaqstannyń ulttyq múddesi eskeriledi.
"Prezident quzyrly mekemelerge Aýǵanstandaǵy jaǵdaidy jan-jaqty baqylaýda ustaýdy tapsyrdy. Bul osy elmen budan bylaiǵy yntymaqtastyq boiynsha sheshim qabyldaý úshin asa mańyzdy", - dep jazdy Ýáli.
15 tamyzda prezident kúshtik qurylymdardyń basshylarymen jiyn ótkizip, Aýǵan Islam Respýblikasyndaǵy azamattarymyz ben diplomattarymyzdyń qaýipsizdigin qamtamasyz etý jóninde tapsyrma berdi.
Dál osy kúni Aýǵanstan biligi eldiń iri qalalary Jalalbad, Mazari-Sharif, Kabýldy tálibterge uryssyz bergeni belgili boldy. Al prezident Ashraf Gani elden ketip, jubaiymen birge Ózbekstan arqyly Omanǵa keldi.
Dúisenbige qaraǵan túni Taliban* Aýǵanstandaǵy soǵystyń jeńispen aiaqtalǵanyn málimdedi. Kabýlda komendanttyq saǵat engizildi.
*Taliban - Qazaqstan, Resei men ózge elderde tyiym salynǵan terroristik uiym.
