Túrkiianyń Antalia qalasynda ótken Ethnosport 2027 jahandyq forýmynda toǵyzqumalaqtyń halyqaralyq mártebesin arttyrý máselesi kóterildi, dep habarlaidy Dala News.
2026 jylǵy 4–5 sáýir kúnderi ótken forým Dúniejúzilik etnosport odaǵynyń arnaiy basqosýyna ainalyp, ulttyq sport túrlerin halyqaralyq deńgeide damytýǵa baǵyttalǵan mańyzdy sheshimder qabyldandy. Ashylý rásiminde Túrkiia parlamentiniń tóraǵasy ári uiym basshysy Bilál Erdoǵan sóz sóiledi.
Forým barysynda Qazaqstannyń Týrizm jáne sport ministri Erbol Myrzabasynov ulttyq sport túrlerin damytý boiynsha júrgizilip jatqan jumystardy tanystyryp, birqatar usynystar usyndy.
Is-sharaǵa Dúniejúzilik toǵyzqumalaq sporty federatsiiasynyń prezidenti Álihan Baimenov, bas hatshy Maqsat Shotaev jáne vitse-prezident, Qazaqstan Toǵyzqumalaq federatsiiasynyń prezidenti Ákim Tursun qatysty. Olar toǵyzqumalaqty Ethnosport 2027 baǵdarlamasyna engizip, halyqaralyq deńgeide keńinen damytý qajettigin atap ótti.
Forým aiasynda toǵyzqumalaq delegatsiiasy birqatar halyqaralyq kezdesýler ótkizip, Túrkiia, Týnis, Litva, Ázirbaijan jáne Ekvador elderiniń ókilderimen bailanys ornatty.
Sondai-aq Bilál Erdoǵanǵa jáne basqa da sheteldik delegattarǵa toǵyzqumalaq taqtalary syiǵa tartylyp, ulttyq ziiatkerlik oiynnyń mańyzy tanystyryldy.
Qatysýshylar toǵyzqumalaqtyń álemde qarqyndy damyp kele jatqanyn atap ótip, onyń iri halyqaralyq sporttyq forýmdarda laiyqty oryn alýǵa tolyq múmkindigi bar ekenin jetkizdi.
