QR syrtqy ister ministri Qairat Ábdirahmanov Qytaida ustalǵan 12 Qazaqstan azamatynyń 9-y bosatylǵanyn málimdedi dep jazady Sputnik Qazaqstan.
Ministr qos azamattyq alǵan etnikalyq qazaqtardyń máselesi eldiń syrtqy saiasi vedomstvosy men úkimetiniń basty nazarynda ekenin atap ótti.
"Biz kún saiyn bul másele boiynsha jumys júrgizemiz. Iske shet elderdiń konsýldyq qyzmetteri, bizdiń mekemeler tartylǵan. Úkimetaralyq kelissózderde qarastyramyz. Bizdiń QHR-men yntymaqtastyǵymyz týraly aitsaq, kelissózder júrgizýge eshqandai kedergi joq. Sáýir aiynda eki mańyzdy issapar boldy. Qazaqstandyq delegatsiianyń Qytaiǵa sapary barysynda biraz másele kóterildi. Sonyń ishinde Qytaida ustalǵan 12 Qazaqstan azamatynyń máselesi qozǵaldy. Qytai tarapynyń túsindirýi boiynsha, olar QHR azamattyǵynan shyǵý protsedýrasyn durys rásimdemegen. Kelissóz nátijesinde 9 azamatymyz bosatyldy. Qalǵan úsheýi boiynsha tiisti sharalar júrgizilip jatyr", — dedi Ábdirahmanov.
Onyń aitýynsha, syrtqy ister ministrliginde qiyndyqqa tap bolǵan 170-tei etnikalyq qazaq týraly aqparat bar.
"Olardyń týystary bizge júgindi, jurtshylyqtan aqparat alyp jatyrmyz. Olardyń taǵdyryna bei-jai qaramaimyz. Biraq sizder mynany túsinýleriń kerek, Qytai azamattary týraly sóz bolǵanda, halyqaralyq Vena konventsiiasyna sáikes, basqa memlekettiń ishki isterine aralasýǵa jol berilmeidi. Sondyqtan bul óte názik másele", — dedi ministr.
Sýret: azattyq.org
