Prezıdentke "qasiretti qańtar" oqıǵasyn tergep-tekserý jumystarynyń barysy jáne ruqsat etilmegen tergeý ádisterine qatysty azamattar men quqyq qorǵaýshylardyń málimetteri negizinde qabyldanyp jatqan sharalar týraly baıandaldy.
Qasym-Jomart Toqaevqa búginde 3070 qylmystyq is qozǵalǵany týraly málimet berildi. Onyń 2710-yn, sonyń ishinde, negizinen, urlyq, tonaý, buzaqylyq, qarý urlaý jáne basqa da qylmystardy ishki ister organdary tergep-tekserip jatyr.
"Bas prokýrordyń aıtýynsha, sybaılas jemqorlyqqa qarsy qyzmet quqyq qorǵaý organdary qyzmetkerleriniń laýazymdyq ókilettikterin asyra paıdalanǵany týraly azamattardyń shaǵymdary boıynsha 173 isti júrgizýde", - delingen habarlamada.
Memleketke opasyzdyq jasaý, ókilettikterdi asyra paıdalaný jáne bılikti basyp alýǵa áreket etý boıynsha 15 is Ulttyq qaýipsizdik komıtetiniń qaraýynda jatyr. Sondaı-aq arnaýly prokýrorlardyń basshylyǵymen vedomstvoaralyq tergeý toby jappaı tártipsizdikter men terorızm aktileri boıynsha 179 isti tekserýde.
Tártipsizdikter órship turǵan kezde qyzmettik ǵımarattardy tastap ketken kúshtik qurylymdar organdarynyń laýazymdy tulǵalaryna qatysty bólek tergeý júrgizilýde. Osyndaı áreketterdiń saldarynan Almaty qalasynda, Almaty jáne Jambyl oblystarynda quqyq qorǵaý organdarynyń arsenalyndaǵy 1500-nan astam qarý qylmyskerlerdiń qolyna túsken.
6 qańtarda Memleket basshysynyń Jarlyǵymen Kárim Másimov Qazaqstan Respýblıkasy Ulttyq qaýipsizdik komıtetiniń tóraǵasy qyzmetinen bosatyldy. Ol bul qyzmetti 2016 jyldan beri atqaryp keledi. Eki ret – 2007 jyldan 2012 jylǵa deıin jáne 2014 jyldan 2015 jylǵa deıin Másimov QR premer-mınıstri boldy.
Másimov memleketke opasyzdyq jasady degen kúdikpen ustaldy.
Keıin UQK tóraǵasynyń burynǵy orynbasary – "A" arnaıy maqsattaǵy qyzmetiniń bastyǵy Ánýar Sadyqulov pen UQK tóraǵasynyń orynbasary Dáýlet Erǵojın ustaldy.
Jalpy alǵanda, qańtar oqıǵasy kezinde 3388 qarý, onyń ishinde 10 ańshylyq dúkeninen 1629 myltyq urlanǵan. Osynyń tek úshten biri nemese 967 qarý tabyldy. Qarýlardy izdeý jáne qaıtaryp alý jumystary jalǵasyp jatyr. Barlyq fakti boıynsha tergep-tekserý júrgizilýde.
Budan bólek Ǵızat Nurdáýletov prezıdentke janar-jaǵarmaı materıaldary, suıytylǵan gaz aınalymy jáne baǵany belgileý, kedendik shekara salasyndaǵy tekserýdiń aldyn ala nátıjeleri týraly esep berdi.
Memleket basshysy qylmystyq qýdalaýǵa túsken azamattardyń konstıtýsıalyq quqyǵyn saqtaýdyń mańyzdy ekenin atap ótti. Qasym-Jomart Toqaev kináli adamdarǵa qatysty jaýapkershilik sharalaryn qabyldaı otyryp, árbir rastalǵan habarlamaǵa der kezinde nazar aýdarýdy, sondaı-aq tergeý barysy jóninde halyqqa ýaqtyly aqparat berýdi tapsyrdy.
https://dalanews.kz/news/73349-masimovtyng-turmedegi-zhagdayy-qanday?fbclid=IwAR0adv6uEzgcjGayX16E5UGLeiavYkZBXAjNszavJPbLRqo8gANlN06WPbc
