TikTok-ta jariialanǵan jazba eki kórshiniń sotqa deiin barýyna sebep boldy. Isti Jambyl oblysyndaǵy Shý aýdandyq soty qarady, dep habarlaidy Dalanews.kz.
Shý qalasynyń turǵyny áleýmettik jeli arqyly kórshisiniń ar-namysy men qadir-qasietine nuqsan keltiretin málimetter taratqan. Sot málimetinshe, jariialanǵan aqparat jalǵan jáne jábirlenýshiniń bedeline ziian keltirýi múmkin bolǵan. Is áleýmettik jelilerdi paidalaný arqyly jasalǵan jala jabý faktisi boiynsha qaralǵan. Atalǵan bap boiynsha jeke tulǵaǵa 180 ailyq eseptik kórsetkish (2026 jyly 778 500 teńge) kóleminde aiyppul nemese 20 táýlikke deiin ákimshilik qamaý jazasy qarastyrylǵan.
Sotta azamatsha A.-nyń kinási taraptardyń túsiniktemelerimen, politsiia materialdarymen jáne saraptama qorytyndysymen dáleldengen. Saraptama jariialanǵan málimetterdiń jábirlenýshiniń ar-namysy men qadir-qasietine nuqsan keltiretinin kórsetken. Sot barysynda A. kinásin ishinara moiyndap, jábirlenýshiden keshirim suraǵanyn jáne mundai áreketti qaitalamaitynyn aitqan.
Jábirlenýshi de istiń mán-jaiyn rastady, taraptardyń tatýlasqanyn málimdep, isti toqtatýdy surady.
Sot tatýlasýǵa bailanysty isti toqtatýǵa bolady degen qorytyndyǵa kelgen. Qaýlymen azamatsha A. ákimshilik jaýapkershilikten bosatylyp, is óndirisi qysqartyldy. Qaýly zańdy kúshine endi.
