TikTok-تا جاريالانعان جازبا ەكى كورشىنىڭ سوتقا دەيىن بارۋىنا سەبەپ بولدى. ءىستى جامبىل وبلىسىنداعى شۋ اۋداندىق سوتى قارادى، دەپ حابارلايدى Dalanews.kz.
شۋ قالاسىنىڭ تۇرعىنى الەۋمەتتىك جەلى ارقىلى كورشىسىنىڭ ار-نامىسى مەن قادىر-قاسيەتىنە نۇقسان كەلتىرەتىن مالىمەتتەر تاراتقان. سوت مالىمەتىنشە، جاريالانعان اقپارات جالعان جانە جابىرلەنۋشىنىڭ بەدەلىنە زيان كەلتىرۋى مۇمكىن بولعان. ءىس الەۋمەتتىك جەلىلەردى پايدالانۋ ارقىلى جاسالعان جالا جابۋ فاكتىسى بويىنشا قارالعان. اتالعان باپ بويىنشا جەكە تۇلعاعا 180 ايلىق ەسەپتىك كورسەتكىش (2026 جىلى 778 500 تەڭگە) كولەمىندە ايىپپۇل نەمەسە 20 تاۋلىككە دەيىن اكىمشىلىك قاماۋ جازاسى قاراستىرىلعان.
سوتتا ازاماتشا ا.-نىڭ كىناسى تاراپتاردىڭ تۇسىنىكتەمەلەرىمەن، پوليسيا ماتەريالدارىمەن جانە ساراپتاما قورىتىندىسىمەن دالەلدەنگەن. ساراپتاما جاريالانعان مالىمەتتەردىڭ جابىرلەنۋشىنىڭ ار-نامىسى مەن قادىر-قاسيەتىنە نۇقسان كەلتىرەتىنىن كورسەتكەن. سوت بارىسىندا ا. كىناسىن ءىشىنارا مويىنداپ، جابىرلەنۋشىدەن كەشىرىم سۇراعانىن جانە مۇنداي ارەكەتتى قايتالامايتىنىن ايتقان.
جابىرلەنۋشى دە ءىستىڭ ءمان-جايىن راستادى، تاراپتاردىڭ تاتۋلاسقانىن مالىمدەپ، ءىستى توقتاتۋدى سۇرادى.
سوت تاتۋلاسۋعا بايلانىستى ءىستى توقتاتۋعا بولادى دەگەن قورىتىندىعا كەلگەن. قاۋلىمەن ازاماتشا ا. اكىمشىلىك جاۋاپكەرشىلىكتەن بوساتىلىپ، ءىس ءوندىرىسى قىسقارتىلدى. قاۋلى زاڭدى كۇشىنە ەندى.
