AQSh astanasyndaǵy eń iri basylym The Washington Post Bishimbaev isi týraly aýqymdy material jariialady, - dep habarlaidy Dalanews.kz.
Amerikalyq basylymdaǵy material sot otyrysynda kórsetilgen beinebaqylaý kamerasyndaǵy videolar týraly bastalady.
"Aiyptalýshy áielin shashynan súirep, artynsha qolymen uryp, aiaǵymen tepkileidi. Birneshe saǵattan keiin ol bas miynyń jaraqatynan qaitys bolady. Qazaqstan burynǵy ulttyq ekonomika ministri Qýandyq Bishimbaevtyń áieli Saltanat Núkenovany óltirýine qatysty is Ortalyq Aziia eliniń júikesin tozdyrdy. Myńdaǵan adam turmystyq zorlyq týraly zańdy qatańdatý úshin petitsiiaǵa qol qoiyp shyqty", - delingen materialda.
Sonymen qatar, amerikalyq jýrnalister 11 sáýirde senatorlar maquldap, artynsha prezident Qasym-Jomart Toqaev qol qoiǵan turmystyq zorlyq týraly zań jaily sóz ete ketken.
"Qazaqstandyqtar Bishimbaev isin jiti baqylap otyr, sebebi sot otyrysyn 19 million adam onlain tamashalai alady jáne áleýmettik jelide bul iske qatysty túrli pikirtalas júrip jatyr. Kópshilik muny Toqaevtyń reformalar júrgizip, sheneýnikterdi jaýapqa tartý týraly ýádeleriniń jany baryn bildiredi dep túsingen.
Bir kezderi burynǵy prezident Nursultan Nazarbaevtyń basshylyǵymen Qazaqstan úkimetiniń jańa, batystyq bilim alǵan tulǵasy bolyp sanalǵan 44 jastaǵy Bishimbaev 2018 jyly para alǵany úshin túrmege qamalyp, 10 jyl bas bostandyǵynan aiyrylyp, eki jyldan keiin bostandyqqa shyqqan".
Sonymen qatar, basylym materialynda Bishimbaevtyń advokattary jaily da sóz qozǵalǵan.
"Onyń advokattary bastapqyda meditsinalyq saraptamany teriske shyǵarýǵa tyrysty. Sondai-aq advokattar ol óte qyzǵanshaq adam bolǵanyn basa aitady. Alaida sot otyrysynda kórsetilgen videolarda Núkenovanyń ózi qyzǵanyshtan shabýyl jasaǵany esh baiqalmaidy".
Núkenovanyń aǵasy Aitbek Amangeldi Associated Press-ke bergen suhbatynda Saltanatqa qatysty is elde turmystyq zorlyqqa qatysty kózqarasty ózgertkenine senimdi ekenin aitady.
Sondai-aq The Washington Post materialynda kórshiles Reseidegidei Qazaqstanda da patriarhaldyq qoǵam bolyp qala beretini jáne turmystyq zorlyq-zombylyq, jynystyq qýdalaý jáne jumyspen qamtý teńsizdigi siiaqty máselelerdegi progress baiaý ekeni aitylady.
"BUU genderlik teńdik agenttiginiń qoldaýymen 2018 jyly júrgizilgen zertteýge sáikes, Qazaqstanda jyl saiyn 400-ge jýyq áiel turmystyq zorlyq-zombylyqtan qaitys bolady, degenmen kóptegen zorlyq-zombylyq jaǵdailary týraly habarlanbaǵan", - delingen materialda.
Eske salaiyq, 27 naýryzda bastalǵan atyshýly sot otyrysyn kún saiyn myńdaǵan adam tikelei efirden tamashalady. Bir aiǵa jýyq ýaqyttan soń, 24 sáýirde Astanada Bishimbaev isine qatysty sot tergeýi aiaqtaldy. Kelesi kezeń – sot jaryssózi.
Sýdia Aijan Qulbaeva sot jaryssózderi ótetin kúnderdi belgiledi: alǵashqysy 30 sáýirde, keiin 2, 3 jáne 4 mamyrda ótedi.
