8 sáýirde Oqý-aǵartý ministri Juldyz Súleimenova pedagogterdiń biliktiligin baǵalaý testileýi alynyp tastalǵanyn málimdegen edi. Alaida araǵa sanaýly kún salyp muǵalimder arasynda attestatsiia men testileýdiń qaita jalǵasatyny týraly aqparat tarady, dep habarlaidy Dalanews.kz.
Redaktsiiaǵa joldanǵan málimetke sáikes, birqatar pedagogter men mektep basshylary ministrlik tarapynan testileýge qatysty jańa habarlama kelgenin aityp, alańdaýshylyq bildirgen.
Muǵalimderdiń sózinshe, olarǵa testti endi bir-aq ret tapsyrýǵa múmkindik beriletini, al buǵan deiin óte almaǵan pedagogterge qaita tapsyrý múmkindigi berilmeitini habarlanǵan. Sonymen qatar keibir ustazdar bilim berý uiymdarynyń basshylary men direktor orynbasarlarynyń da testileýden ótetini aitylǵanyn jetkizdi.
"Jaqynda ǵana attestatsiia toqtaidy degen aqparat aitylǵan edi. Endi qaitadan test tapsyratynymyz habarlanyp jatyr. Munyń bári bir kúnde ózgerip ketkendei. Muǵalimder ne bolyp jatqanyn túsinbei otyr", – deidi pedagogterdiń biri.
Buǵan qosa, redaktsiia ieligindegi resmi hatta pedagogterdi attestattaý rásimi 14 sáýirden bastap jalǵasatyny kórsetilgen. Qujatta alǵash ret pedagog bilimin baǵalaýǵa qatysatyn tulǵalar úshin 16–27 sáýir aralyǵynda testileý ótetini jazylǵan.
Atalǵan aqparat áleýmettik jelide de qyzý talqylanyp jatyr. Kópshilik ministrdiń testileýdi alyp tastaý jónindegi málimdemesinen keiin mundai ózgeristerdiń paida bolýyn túsine almai otyrǵanyn aitýda.
Ministrlik ne deidi?
Kúni keshe Oqý-aǵartý ministrligi pedagogterdi attestatsiialaýdyń jańa modelin ázirleý boiynsha málimdeme jasady.
Vedomstvonyń habarlaýynsha, reformalardyń negizgi maqsaty – pedagog eńbegin ádil ári ashyq baǵalaý júiesin qalyptastyrý, artyq talaptar men negizsiz qarjylyq shyǵyndardy qysqartý.
Ministrlik jańa attestattaý júiesi pedagogterdiń jumys nátijelerine negizdelip, barynsha túsinikti ári obektivti formatqa kóshiriletinin málimdedi.
"Negizgi ózgeris – pedagogterdiń bilimin baǵalaý testi tolyǵymen toqtatylady", – dep habarlady ministrlik.
Alaida vedomstvo testileý barlyq pedagogter úshin birdei joiylmaitynyn naqtylady. Ministrliktiń túsindirýinshe, test pedagogikalyq oqý oryndaryn jańa aiaqtaǵan jas mamandarǵa, pedagogikalyq qyzmetine úzilis jasap qaita oralǵan ustazdarǵa, sondai-aq bilim berý uiymdarynyń basshylaryna, olardyń orynbasarlaryna jáne ádistemelik ortalyq ádiskerlerine saqtalady.
Sondai-aq mektepte keminde eki jyl úzdiksiz eńbek ótili bar pedagogter biliktilik sanatyn alýǵa ótinish bere alady.
"Olardyń biliktiligin baǵalaý jańa qaǵidalarǵa sáikes tek praktikalyq nátijeler negizinde júrgiziledi", - delingen habarlamada.
Ministrlik málimetinshe, munda pedagogtiń kásibi jetistikteri, oqýshylarynyń nátijesi jáne oqý-tárbie jumysynyń sapasy eskeriledi.
Sonymen birge barlyq deńgeidegi pedagogter úshin avtorlyq baǵdarlamalar men oqý-ádistemelik materialdardy usyný talaby alyp tastalady.
"Atalǵan ózgerister 2027 jyldan bastap engiziletin attestattaý júiesine bailanysty", - dep málimdedi vedomstvo.
Ministrlik jańa júiege kezeń-kezeńimen kóshý úshin ótpeli kezeń qarastyrylǵanyn da atap ótti.
"Olardyń attestattaýy 2026–2027 oqý jylyna aýystyrylyp, jańa qaǵidalar boiynsha PBB tapsyrý qajettiliginsiz ótkiziledi", - delingen resmi aqparatta.
Osyǵan bailanysty pedagogter Oqý-aǵartý ministrliginen attestatsiia tártibine qatysty naqty túsinikteme berýdi talap etip otyr.
Atalǵan jaǵdai boiynsha Dalanews.kz redaktsiiasy Oqý-aǵartý ministri Juldyz Súleimenovaǵa resmi saýal joldady.
