Ishki ister ministrligi terrorizm aktisi týraly jalǵan habarlama úshin jaýapkershilik qarastyrylatynyn eske saldy, dep habarlaidy Dalanews.kz.
“Qurmetti azamattar! Sońǵy kezde bilim berý mekemelerinde ornatylǵan jarylǵysh zattar týraly jalǵan habarlamalar jiilep ketti. Barlyq osyndai faktiler boiynsha sotqa deiingi tergeý bastaldy. Qajetti tergeý áreketteri júrgizilip jatyr. Aita ketý kerek, mundai qylmys jasaǵan adamdar arasynda kámeletke tolmaǵandar jii kezdesýde.
Jyl basynan beri 168 qylmystyq is qozǵalyp, 31 adam ustaldy, onyń ishinde 12-si kámeletke tolmaǵan bala. 13 adam sottaldy, onyń ishinde ekeýi jasóspirim. Alty ata-anaǵa aiyppul salyndy. Árbir jalǵan habarlama turǵyndar arasynda úrei týdyryp, mekemelerdiń jumysyna kedergi keltiredi. Olar materialdyq shyǵyn ákelip qana qoimai, shuǵyl qyzmetterdiń ýaqytyn alady”, - deidi departament bastyǵy – IIM resmi ókili Shyńǵys Alekeshev.
Onyń sózinshe, terrorizm aktisi týraly kórineý jalǵan habarlama úshin 5000 AEK-ke deiingi aiyppuldan bastap, 5 jylǵa deiingi merzimge bas bostandyǵynan aiyrý jazasy qarastyrylǵan.
“Bul qylmys úshin 14 jastan bastap qylmystyq jaýapkershilik kózdeledi. Eger kámeletke tolmaǵannyń jasy 14 jastan aspasa, onda bul jaǵdaida onyń ata-anasy tárbieleý boiynsha mindettemelerin atqarmaǵany úshin jaýapkershilikke tartylady”, - dep qosty ol.
Budan bólek, sot sheshimimen ata-analar shuǵyl qyzmetterdiń shaqyrtýǵa shyǵyp, nysandardy tekserýge ketken shyǵynyn óteýge mindetteledi.
“Ishki ister ministrligi ata-analardy balalardyń minez-qulqyna erekshe nazar aýdarýǵa shaqyrady. Jasóspirimderge osyndai áreketterdiń sońy nege ákeletinin túsindirińizder. Terrorizm aktisi týraly kórineý jalǵan habarlamalar úshin qatań jaza qarastyrylatynyn eske saqtańyzdar. Qoǵamdyq tártipti qamtamasyz etý – barshamyzdyń ortaq mindetimiz. Birlesip qana, biz balalarymyz úshin qaýipsiz orta qura alamyz”, – dedi Shyńǵys Alekeshev.
