Teńizde jumysshylar 21 sáýirde tańerteń saǵat 7-den bastap jalaqysyn 50 paiyzǵa kóterýdi talap etip, videoúndeý jariialaǵan edi. Jumysshylar taraǵan, biraq jalaqy máselesi ashyq kúide qalǵan, - dep habarlaidy Dalanews.kz.
"Aq jaiyq" basylymy málimetinshe, Teńiz ken ornynda jalaqyny kóterýdi talap etken «Kásibi tańdaý» JShS rekrýting mekemesiniń jumysshylary 22 sáýirde tańerteń saǵat 7.30-da taraǵan. Bul týraly memlekettik eńbek inspektsiiasy komitetiniń Atyraý oblysy boiynsha departamenti basshysynyń orynbasary Kemel Imanǵaliev málimdegen.
Keiinirek «Aq Jaiyq» redaktsiiasyna belsendilerge qysym kórsetilgeni týraly aqparat kelgen:
"Jumys berýshi talapty oryndaýǵa qulqysy joq, onymen qoimai 180 adamdy qýdalaýǵa nietti. Erteńge aramyzdaǵy belsendilerge bólimge shaqyrtý kelip jatyr, kelmegen jaǵdaida májbúrli túrde alyp ketýge eskertý keldi", - dep jazylǵan habarlamada.
Al memlekettik eńbek inspektsiiasy komitetiniń Atyraý oblysy boiynsha departamenti basshysynyń orynbasary Kemel Imanǵalievtyń sózinshe, taraptar kelisimge kelgen. Jumys berýshi óz tarapynyn jumysshylardy qýdalamaitynyn jáne jumys istemegen eki kúnge jalaqy esepteletinin habarlaǵan.
Memlekettik eńbek inspektsiiasynyń basshysy Igilik Áýbekerovtiń sózinshe, jalaqyny 100 paiyzǵa kóterý týraly talap bolmaǵan. Ol jumysshylar eki topqa bólingenin túsindirdi: 120-dan asa jumysshy jalaqyny 50 paiyzǵa kóbeitýdi surasa, 90-ǵa jýyq jumysshy vahta merzimin qysqartýdy, iaǵni 28 kún jumysty 14 kúnge aýystyrýdy talap etken. Talap qoiýshy jumysshylar – qoimada jáne kólik qyzmetin usyný bóliminde isteitin túrli laýazym ieleri.
"Birinshi top kelissózder ótetin zalǵa kirýden bas tartyp, syrtta qalyp, laýazymyn kóterý týraly jazbasha buiryqty talap etken. Kompaniia basshylary olarǵa «máseleni bir kún talqylaý úshin demalys beremiz. Zalǵa kelip, kelissózge kelińder» degen. Biraq jumysshylar «dalada talqylaimyz, jalaqyny 50 paiyzǵa kóterý týraly buiryq alyp kel» dep, kelispedi. Jumysshylarǵa jumysqa shyqpasa, jumys tártibin buzǵan bop sanalady dep eskertildi. Budan soń qýdalamaimyz degen aýyzsha ýádesin alǵan soń jumysshylar tarasqan.
Al 14/14 vahtalyq jumys ádisine aýystyrýdy suraǵan jumysshylar keńseniń májilis zalyna kelip, talaptaryn aitqan. «Kásibi tańdaý» men COCR kompaniialary basshylary olardyń talabyn tyńdap, sheshýge tyrysamyz dep ýáde bergen jáne memorgandar kózinshe talaptaryn qoiǵany úshin qýdalamaimyz dep sendirgen. Osydan keiin ǵana jumysshylar jataqhanaǵa barýǵa kelisken", - dep jazylǵan málimette.
Basylym málimetinshe, jalaqyny 50 paiyzǵa kóterý týraly talaby ashyq kúiinde qalǵan. Kompaniia basshylary jumysshylarǵa jalaqy boiynsha óz baǵdarlamasy men jospary aiasynda jyl saiyn jalaqy men naryq baǵasyn taldap, jyl aiaǵynda jalaqy kóteretinin alǵa tartqan. Biraq jalaqyny 10 paiyzǵa ósire me, álde 50 paiyzǵa ósire me, bul - belgisiz.
"Ony kompaniia júrgizilgen taldaý qorytyndysyna qarap sheshedi", - deidi Áýbekerov.
Eske salaiyq, buǵan deiin Teńiz kenishinde jalaqy daýyna bailanysty 140-tan asa jumysshy talap qoiǵany habarlandy.
