Abai atyndaǵy Qazaq ulttyq opera jáne balet teatry 90 jyldyq maýsymyn "Mura" gala kontsertimen atap ótip, óner oshaǵynyń alańyn qozǵalmaly alyp sahnaǵa ainaldyrdy, dep habarlaidy Dalanews.kz.
Jandy dybys. Jaryq shoýy. Qazaq batyrlary, qumai tazylar men búrkitshiler sherýi. Ońtústik astananyń myńnan asqan turǵyny men qonaǵy klassika álemi men ultymyzdyń súiikti týyndylaryn tamashalady. Bul kúndi barlyǵy: bizdiń kórermen de, teatrdyń shyǵarmashylyq ujymy da asyǵa kútken edi.
Ashyq aspan astynda Abai atyndaǵy teatrdyń 200 ártisi sheberligin pash etti. Asqaq ónerdi súier qaýym aldynda jarqyraǵan juldyzdar: Qazaqstan men Tatarstannyń halyq ártisi Nurjamal Úsenbaeva, Qazaqstannyń Eńbek sińirgen qairatkerleri Jámilia Baspaqova men Gúlzat Daýyrbaeva, "Qurmet" ordeniniń iegeri Zarina Altynbaeva, halyqaralyq konkýrstardyń jeńimpazdary Nurjan Bajekenov, Farhad Kýbiev, Oksana Davydenko, Balýan Berkenov, Malika Elchibaeva, Bogdan Verbovoi, Janel Týkeeva jáne teatrdyń basqa da opera jáne balet ártisteri usyndy.
Kontsert baǵdarlamasy dástúrli túrde Ahmet Jubanov-Latif Hamididiń «Abai» operasyndaǵy «Toi bastardyń» tátti shashýynan bastaý aldy. Ásemdiktiń tolqynyn kórgen saiyn kóz toimas P. I. Chaikovskiidiń «Aqqý kóli» adajiosy jalǵastyryp jatty. Sahnada qalyqtaǵan aq jelken Franchesko Sartori men Lýchio Kvarantotonyń ariia stilindegi «Time to say goodbye» balladasymen úmit otyn mazdatsa, Endriý Lloid Ýebberdiń jandy baýraityn «Opera elesi» miýziklyndaǵy Kristina men Elestiń dýety qozǵalmaly sahnanyń aýqymy men keremettigin aishyqtai tústi.
Al júrek tebirenter hor oryndaǵan Karl Orftyń "Karmina Býrana" kantatasynyń "O, Fortýnasy!" kúlli gala kontserttiń atmosferasyn basqardy desek artyq bolmas. Mýzykalyq sharanyń ár nómiri ashyq aspan astynda qoiylatyndai arnaiy oilastyrylǵan. Sezimin jasyrmaǵan kórermen tenorlar sherýinde Abaidyń "Kózimniń qarasyn", Edýardo di Kapýanyń "'O sole mio-sy" men Agýstin Laranyń "Granadasyn" birge shyrqady.
- Siqyrly kesh boldy. Abai atyndaǵy teatr men Almaty qalasynyń ákimdigine raqmet. Mundai sahnada men de shyrqar edim.
- Mundai ashyq aspan astyndaǵy qoiylymǵa, onyń ústine operaǵa birinshi kelýim – óte áserli boldy.
Buryn-sońdy bolmaǵan kesh. Osy bir asqaq mýzykalyq nómirlerdi usynǵany maǵan baqyt sezimin syilady jáne men erekshe maqtanyshpen melodiianyń yrǵaǵyna bilep aldym. Akkomponementi keremet jáne ártisteri myqty. Kóp raqmet! –dep "Mura" gala kontsertine kelgen kórermen áserimen bólisti.
Kontsert barysynda jas jigittiń súiiktisine sahnada sóz aitqysy kelgen ótinishi naǵyz kútpegen jaǵdaiǵa ainaldy. Árine, bul keshte barlyq armandar oryndalyp, ǵashyqtar aiamai shapalaq urǵan kópshiliktiń kózinshe sóz bailasty.
Almaty qalasynyń kúnine arnaiy orailastyrylǵan kesh ádemi otshashýmen aiaqtalyp, mádeni astanamyzdyń aspanyn jarqyratty. Tarihi óner ordasy – Abai atyndaǵy qara shańyraq óziniń 91-shi maýsymyn osylai keremet, erekshe bastady.
