اباي اتىنداعى قازاق ۇلتتىق وپەرا جانە بالەت تەاترى 90 جىلدىق ماۋسىمىن "مۇرا" گالا كونسەرتىمەن اتاپ ءوتىپ، ونەر وشاعىنىڭ الاڭىن قوزعالمالى الىپ ساحناعا اينالدىردى، دەپ حابارلايدى Dalanews.kz.
جاندى دىبىس. جارىق شوۋى. قازاق باتىرلارى، قۇماي تازىلار مەن بۇركىتشىلەر شەرۋى. وڭتۇستىك استانانىڭ مىڭنان اسقان تۇرعىنى مەن قوناعى كلاسسيكا الەمى مەن ۇلتىمىزدىڭ سۇيىكتى تۋىندىلارىن تاماشالادى. بۇل كۇندى بارلىعى: ءبىزدىڭ كورەرمەن دە، تەاتردىڭ شىعارماشىلىق ۇجىمى دا اسىعا كۇتكەن ەدى.
اشىق اسپان استىندا اباي اتىنداعى تەاتردىڭ 200 ءارتىسى شەبەرلىگىن پاش ەتتى. اسقاق ونەردى سۇيەر قاۋىم الدىندا جارقىراعان جۇلدىزدار: قازاقستان مەن تاتارستاننىڭ حالىق ءارتىسى نۇرجامال ۇسەنبايەۆا، قازاقستاننىڭ ەڭبەك سىڭىرگەن قايراتكەرلەرى ءجاميليا باسپاقوۆا مەن گۇلزات داۋىربايەۆا، "قۇرمەت" وردەنىنىڭ يەگەرى زارينا التىنبايەۆا، حالىقارالىق كونكۋرستاردىڭ جەڭىمپازدارى نۇرجان باجەكەنوۆ، فارحاد كۋبييەۆ، وكسانا داۆىدەنكو، بالۋان بەركەنوۆ، ماليكا ەلچيبايەۆا، بوگدان ۆەربوۆوي، جانەل تۋكەيەۆا جانە تەاتردىڭ باسقا دا وپەرا جانە بالەت ارتىستەرى ۇسىندى.
كونسەرت باعدارلاماسى ءداستۇرلى تۇردە احمەت جۇبانوۆ-لاتيف حاميديءدىڭ «اباي» وپەراسىنداعى «توي باستاردىڭ» ءتاتتءى شاشۋىنان باستاۋ الدى. اسەمدىكتىڭ تولقىنىن كورگەن سايىن كوز تويماس پ. ي. چايكوۆسكءييدىڭ «اققۋ كولى» اداجيوسى جالعاستىرىپ جاتتى. ساحنادا قالىقتاعان اق جەلكەن فرانچەسكو سارتوري مەن لۋچيو كۆارانتوتونىڭ اريا ستيلىندەگى «Time to say goodbye» باللاداسىمەن ءۇمىت وتىن مازداتسا، ەندريۋ للويد ۋەببەرءدىڭ جاندى باۋرايتىن «وپەرا ەلەسى» ميۋزيكلىنداعى كريستينا مەن ەلەستىڭ دۋەتى قوزعالمالى ساحنانىڭ اۋقىمى مەن كەرەمەتتىگىن ايشىقتاي ءتۇستى.
ال جۇرەك تەبىرەنتەر حور ورىنداعان كارل ورفتىڭ "كارمينا بۋرانا" كانتاتاسىنىڭ "و، فورتۋناسى!" كۇللى گالا كونسەرتتىڭ اتموسفەراسىن باسقاردى دەسەك ارتىق بولماس. مۋزىكالىق شارانىڭ ءار ءنومىرى اشىق اسپان استىندا قويىلاتىنداي ارنايى ويلاستىرىلعان. سەزىمىن جاسىرماعان كورەرمەن تەنورلار شەرۋىندە ابايدىڭ "كوزىمنىڭ قاراسىن"، ەدۋاردو دي كاپۋانىڭ "'O sole mio-سى" مەن اگۋستين لارانىڭ "گراناداسىن" بىرگە شىرقادى.
- سيقىرلى كەش بولدى. اباي اتىنداعى تەاتر مەن الماتى قالاسىنىڭ اكىمدىگىنە راقمەت. مۇنداي ساحنادا مەن دە شىرقار ەدىم.
- مۇنداي اشىق اسپان استىنداعى قويىلىمعا، ونىڭ ۇستىنە وپەراعا ءبىرىنشى كەلۋىم – وتە اسەرلى بولدى.
بۇرىن-سوڭدى بولماعان كەش. وسى ءبىر اسقاق مۋزىكالىق نومىرلەردى ۇسىنعانى ماعان باقىت سەزىمىن سىيلادى جانە مەن ەرەكشە ماقتانىشپەن مەلوديانىڭ ىرعاعىنا بيلەپ الدىم. اككومپونەمەنتى كەرەمەت جانە ارتىستەرى مىقتى. كوپ راقمەت! –دەپ "مۇرا" گالا كونسەرتىنە كەلگەن كورەرمەن اسەرىمەن ءبولىستى.
كونسەرت بارىسىندا جاس جىگىتتىڭ سۇيىكتىسىنە ساحنادا ءسوز ايتقىسى كەلگەن ءوتىنىشى ناعىز كۇتپەگەن جاعدايعا اينالدى. ارينە، بۇل كەشتە بارلىق ارماندار ورىندالىپ، عاشىقتار اياماي شاپالاق ۇرعان كوپشىلىكتىڭ كوزىنشە ءسوز بايلاستى.
الماتى قالاسىنىڭ كۇنىنە ارنايى ورايلاستىرىلعان كەش ادەمى وتشاشۋمەن اياقتالىپ، مادەني استانامىزدىڭ اسپانىن جارقىراتتى. تاريحي ونەر ورداسى – اباي اتىنداعى قارا شاڭىراق ءوزىنىڭ 91-ءشى ماۋسىمىن وسىلاي كەرەمەت، ەرەكشە باستادى.
