Qazaqstanda balalardyń áleýmettik jelilerdi paidalanýyna shekteý qoiý múmkindigi áli de talqylanyp jatyr. Bul týraly Oqý-aǵartý ministri Juldyz Súleimenova Úkimette ótken brifingte málimdedi, dep habarlaidy Dalanews.kz.
Ministrdiń aitýynsha, vedomstvoda bul baǵytta birneshe usynys qarastyrylyp, arnaiy jumys toby qurylǵan. Onyń sózinshe, balalardy zańsyz ári ziiandy kontentten qorǵaýǵa baǵyttalǵan túrli tásil bar jáne mundai tájiribeler birqatar elde zańnamalyq deńgeide engizilgen.
"Bul másele áli ashyq kúiinde qalyp otyr. Ol qoǵammen, sonyń ishinde ata-analarmen, pedagogtermen jáne media ókilderimen birlesip talqylanady", – dedi ministr.
Jýrnalister suraǵyna jaýap bergen Juldyz Súleimenova naqty tetikter jumys tobynyń otyrystary bastalǵannan keiin belgili bolatynyn aitty. Aldyn ala usynylyp otyrǵan birneshe baǵyt bar.
Atap aitqanda, ministrlik balalarǵa arnalǵan SIM-kartalardy tirkeý júiesin engizý múmkindigin qarastyryp otyr. Sonymen qatar 14 jasqa deiingi balalarǵa kórsetiletin quqyqqa qaishy kontentti baqylaý tetikterin ázirleý de osy qatarda.
Budan bólek, mektep baǵdarlamasynda bar tsifrlandyrý jáne mediasaýat pánderi aiasynda oqýshylardyń tsifrlyq ortada saýatty bolýyna erekshe mán berilmek.
Ministrdiń aitýynsha, balalardyń áleýmettik jelilerdegi belsendiligin shekteý sekildi máseleler media jáne ata-analar qaýymdastyǵymen keńese otyryp, ashyq formatta sheshilýi tiis.
