Qarjy ministri Mádi Tákiev eldegi oiyn biznesiniń ainalymyna qatysty pikir bildirdi, dep habarlaidy Dalanews.kz.
Tizgin.kz agenttiginiń jýrnalisi Tákievke oiyn biznesine qatysty depýtattardyń málimdemesi boiynsha suraq qoidy.
“Baqytjan Bazarbek pen Ermurat Bapi myna oiyn biznesin rettemek bolyp otyrǵan ESU júiesine qarsy málimdeme jasady. “Endi oiyn biznesinen túsetin tórt trillion teńgeniń úsh trillion teńgesi Reseige ketedi”, — dedi. Alaida bul posttar biraz ýaqyttan keiin joiylyp ketti.
Depýtattyń úndemei qoia salýyna bolar ma edi? - degen suraq qoiyldy. Depýtattyń ózinen surap edik, “burynǵy pozitsiiamdy qalamyn” dedi. Jalpy, sizder qarjy júiesine jaýapty adamdarsyzdar ǵoi. Rasynda da Qazaqstannan osynshama kóp aqsha ketetindei qaýip tónip tur ma?”, - dep surady jýrnalist.
Ministr óz kezeginde oiyn biznesiniń qarjylai ainalymyna toqtaldy.
“Men sizge bir-eki tsifr aitaiyn. Bizde 12 býkmeker bar. Búgingi tańda Qarjy ministrligi býkmekerlerdiń barlyǵynyń aqparattyq baǵdarlamalaryna qosylǵan. Jalpy, 10 aidyń qorytyndysy boiynsha shamamen 1 trillion 200 milliard teńge kóleminde aqsha stavkaǵa qoiylǵan. Onyń 800 milliardy qaita qaitarylǵan. Iaǵni, jeńip alǵan aqsha. Al 400 milliard teńge shamasynda olardyń taza kirisi boldy. Bul - on eki býkmeker boiynsha aqparat”, - dedi ol.
“Sonda sol 800 milliard teńge - jeńiske qaitarylǵan aqsha ǵoi, durys pa?”, - dep naqtylady jýrnalist.
“Iá, dál solai. Al shamamen 400 milliardtai - olardyń taza tabysy”, - dep jaýap qatty ministr.
“Mádi Tókeshuly, siz bul depýtattardyń málimdemelerimen tanyssyz ǵoi. Negiz bar ma, jurtshylyq qorqatyndai? Álde ESU júiesi arqyly Reseige Qazaqstannyń kóp aqshasy ketedi degen negizsiz aqparat pa?…”, — dep surady jýrnalist.
Alaida ministr bul suraqqa jaýap berýden bas tartty.
“Ony basqa ministrlikke qoiyńyz. Atalǵan suraqqa men jaýap bere almaimyn. Men sizge tsifrlardy ǵana aityp otyrmyn. Biz búginde on eki býkmekerdi óz júiemizge qosqanbyz, olardyń bárin kórip otyrmyz. Kim, qansha, qandai stavka qoiyp jatyr — barlyǵy bizdiń baqylaýda. Al qarajattyń ári qarai qaida ketip jatqanyn aitý bizdiń quzyretimizge kirmeidi. Osy shegine deiin ǵana jaýap bere alamyn”, — dedi ol.
