Búgin Jetisý oblysynda «Taza Qazaqstan» ekologiialyq baǵdarlamasy aiasynda jalpyoblystyq senbilik ótti. Aýqymdy sharaǵa óńirdegi barlyq eldi mekenderdiń turǵyndary, memlekettik organdardyń, kásiporyndar men kommýnaldyq mekemelerdiń qyzmetkerleri, sondai-aq volonterler, eko-belsendiler jáne úkimettik emes uiymdardyń ókilderi qatysty. Osy kúni Taldyqorǵan qalasyndaǵy «Qaratal» shaǵyn aýdanynda ornalasqan Jetisý ýniversitetiniń stýdenttik jataqhanasy aýmaǵynda oblys ákimi Beibit Isabaev jastarmen birge aýmaqty kógaldandyrý jumystaryna qatysyp, 50 qylqan japyraqty aǵash otyrǵyzdy. Jalpy, bul senbilik aiasynda oblys boiynsha 8 myńnan astam aǵash otyrǵyzyldy, dep habarlaidy Dalanews.kz.
Jasyl jelekterdi egip bolǵan soń óńir basshysy senbilikke kelgen jastarmen áńgimelesip, óskeleń urpaqtyń jan-jaqty damýynyń mańyzdylyǵyn atap ótti.
– Búgingi zaman – tsifrlandyrý ǵasyry, tsifrlyq saýattylyq jastar úshin asa qajet. Ekonomikanyń damýy jańa tehnologiiaǵa, tereń bilimge, ár adamnyń ózin-ózi tárbieleýine, tabiǵatqa, qoǵam isine jaýapkershilikpen qaraýǵa tikelei bailanysty. Sondyqtan únemi bilim alyp, úzdiksiz ózderińdi damyp otyrý qajet, – dedi Beibit Isabaev.
Taldyqorǵan qalasy ákimdiginiń málimetinshe, búgingi senbilik barysynda 2000 dana sharýashylyq qural-jabdyǵy taratylyp, 44 birlik arnaiy tehnika jumyldyryldy, 238 tonna qoqys shyǵaryldy. Sonymen qatar kógaldandyrý jumystaryna erekshe kóńil bólinýde. Biyl Taldyqorǵanda 13 myń aǵash otyrǵyzý josparlanǵan, onyń 2 myńy kóktemde, 11 myńy kúzde egilmek. Qazirgi ýaqytta 200-den astam kóshet otyrǵyzyldy, qalǵany sáýir aiynyń sońyna deiin egiledi. Otyrǵyzylǵan aǵashtarǵa kútim jasaý jumysy da júieli júrgiziledi.
Tazalyq sharasy týraly qatysýshylardyń biri Sabina Nurahmet pikir bildirdi:
– Men «Avitsenna» meditsinalyq kolledjiniń 1-kýrs stýdentimin. «Meiirger isi» mamandyǵy boiynsha bilim alyp jatyrmyn. Osyndai qoǵamdyq is-sharalarǵa únemi qatysamyn. Búgin biz aǵash otyrǵyzyp, aýmaqty tazalaý jumystaryna atsalystyq. Aldaǵy ýaqytta da osy jasyl jelekterge kútim jasaýǵa qatysatyn bolamyz. Tabiǵatqa qamqorlyq jasaý – bizdiń paryzymyz, – dedi ol.
Sondai-aq Eskeldi aýdany Kókjazyq aýylynyń turǵyny da oi qosty:
– Biz ár senbi saiyn aýylymyzdy tazalaý jumystaryna qatysamyz. Búgin aǵash dińderin áktedik, aýmaqty tazalap, qoqystan arylttyq. Aýylymyz taza ári kórikti bolǵanyn qalaimyz, sondyqtan oǵan óz úlesimizdi qosamyz, - dedi ol.
Jalpy oblys boiynsha senbilikke 15 myńnan astam adam qatysyp, 225 birlik tehnika jumyldyryldy. Óńirdiń eldi mekenderinde 8 myńnan astam aǵash otyrǵyzyldy, onyń 6800-i japyraqty, 1426-sy qylqan japyraqty aǵashtar.
Al jyl basynan beri oblystyń sanitarlyq tazalyǵyna 37 myńnan astam adam qatysyp, 576 birlik tehnika paidalanylǵan. Sonyń nátijesinde 3,9 myń tonnadan astam qoqys shyǵarylyp, shamamen 19,9 myń aǵash otyrǵyzyldy.
Taǵy bir atap óterligi, qazirgi ýaqytta Taldyqorǵan qalasynda abattandyrý baǵytyndaǵy infraqurylymdyq jobalar júzege asyrylýda. Sonyń biri Qaratal ózeniniń jaǵalaýynda 9 gektar aýmaqta avtomatty sýarý júiesin ornatý jumystary júrgizilip jatyr. Atalǵan qurylys ýchaskesine jaýapty Baǵdat Tasbolatovtyń aitýynsha, jumystar naýryz aiynda bastalyp, mamyr aiynyń ortasynda aiaqtalady, nysanda shamamen 40 adam eńbek etýde. Qazirgi tańda jalpy jumys kóleminiń shamamen 50%-y oryndaldy. 40 myń sharshy metr jasyl gazon aýmaǵynda 44 magnittik klapan ornatylyp, ár aimaq jeke-jeke sýarylatyn bolady. Sýmen qamtamasyz etý úshin jeke uńǵyma qazylýda.
Osyndai jumystar «Jastar» saiabaǵynda da júrgizilýde, munda jańbyrlatyp sýarý júiesi 4 gektar aýmaqty qamtidy. Jobaǵa merdiger uiymnyń 20 jumysshysy men 12 birlik tehnikasy jumyldyrylǵan. Qazirgi ýaqytta jumystardyń 30%-y oryndaldy, jobany belgilengen merzimnen buryn — shamamen maýsym–shilde ailarynda aiaqtaý josparlanyp otyr.
