Memleket basshysynyń Kóbeituz kóline erekshe qorǵalatyn tabiǵi aýmaq mártebesin berý týraly tapsyrmasyn oryndaý aiasynda Aqmola oblysynda sý aidynyn "Buirataý" memlekettik ulttyq tabiǵi parkiniń quramyna qosý boiynsha daiyndyq jumystary júrgizilip jatyr, dep habarlaidy dalanews.kz.
Qazirgi ýaqytta kól aýmaǵynda tabiǵatty qorǵaý sharalarynyń kesheni júzege asyrylyp keledi. Kólge irgeles aýmaqta qorshaýlar men aqparattyq taqtalar ornatyldy. Aldaǵy ýaqytta kól aýmaǵynda qonaqtar úshin arnaiy avtoturaq pen sholý alańdary paida bolady. Bul qorshaǵan ortaǵa ziian keltirmei ony tamashalaýǵa múmkindik beredi.
Sonymen qatar, kólge qatysty birqatar shekteý qoiylyp otyr: avtokólikpen kirýge, jaǵalaý aýmaǵyna barýǵa, shomylýǵa, tuz ben emdik balshyq jinaýǵa tolyqtai tyiym salynady. Ulttyq parktiń memlekettik inspektorlary men politsiia qyzmetkerleri aýmaqty táýlik boiy kúzetip jatyr.
Bul sharalar sońǵy jyldary aitarlyqtai antropogendik zardap shekken kóldi saqtaýǵa baǵyttalǵan. Aqmola oblysynyń ákimdigi azamattardy biregei ekojúieni bolashaq urpaq úshin saqtaý maqsatynda belgilengen talaptardy qatań saqtaýǵa shaqyrady.
Astanadan shamamen 160 shaqyrym jerde ornalasqan Kóbeituz kóli óziniń erekshe qyzǵylt reńimen tanymal. Osyndai biregei tabiǵi erekshelik myńdaǵan týristiń qyzyǵýshylyǵyn týdyryp, kólge keletin adam sany jyl saiyn artyp keledi.
