مەملەكەت باسشىسىنىڭ كٶبەيتۇز كٶلٸنە ەرەكشە قورعالاتىن تابيعي اۋماق مەرتەبەسٸن بەرۋ تۋرالى تاپسىرماسىن ورىنداۋ اياسىندا اقمولا وبلىسىندا سۋ ايدىنىن "بۇيراتاۋ" مەملەكەتتٸك ۇلتتىق تابيعي پاركٸنٸڭ قۇرامىنا قوسۋ بويىنشا دايىندىق جۇمىستارى جٷرگٸزٸلٸپ جاتىر, دەپ حابارلايدى dalanews.kz.
قازٸرگٸ ۋاقىتتا كٶل اۋماعىندا تابيعاتتى قورعاۋ شارالارىنىڭ كەشەنٸ جٷزەگە اسىرىلىپ كەلەدٸ. كٶلگە ٸرگەلەس اۋماقتا قورشاۋلار مەن اقپاراتتىق تاقتالار ورناتىلدى. الداعى ۋاقىتتا كٶل اۋماعىندا قوناقتار ٷشٸن ارنايى اۆتوتۇراق پەن شولۋ الاڭدارى پايدا بولادى. بۇل قورشاعان ورتاعا زييان كەلتٸرمەي ونى تاماشالاۋعا مٷمكٸندٸك بەرەدٸ.
سونىمەن قاتار, كٶلگە قاتىستى بٸرقاتار شەكتەۋ قويىلىپ وتىر: اۆتوكٶلٸكپەن كٸرۋگە, جاعالاۋ اۋماعىنا بارۋعا, شومىلۋعا, تۇز بەن ەمدٸك بالشىق جيناۋعا تولىقتاي تىيىم سالىنادى. ۇلتتىق پاركتٸڭ مەملەكەتتٸك ينسپەكتورلارى مەن پوليتسييا قىزمەتكەرلەرٸ اۋماقتى تەۋلٸك بويى كٷزەتٸپ جاتىر.
بۇل شارالار سوڭعى جىلدارى ايتارلىقتاي انتروپوگەندٸك زارداپ شەككەن كٶلدٸ ساقتاۋعا باعىتتالعان. اقمولا وبلىسىنىڭ ەكٸمدٸگٸ ازاماتتاردى بٸرەگەي ەكوجٷيەنٸ بولاشاق ۇرپاق ٷشٸن ساقتاۋ ماقساتىندا بەلگٸلەنگەن تالاپتاردى قاتاڭ ساقتاۋعا شاقىرادى.
استانادان شامامەن 160 شاقىرىم جەردە ورنالاسقان كٶبەيتۇز كٶلٸ ٶزٸنٸڭ ەرەكشە قىزعىلت رەڭٸمەن تانىمال. وسىنداي بٸرەگەي تابيعي ەرەكشەلٸك مىڭداعان تۋريستٸڭ قىزىعۋشىلىعىن تۋدىرىپ, كٶلگە كەلەتٸن ادام سانى جىل سايىن ارتىپ كەلەدٸ.
