Qazaqstannyń taýly óńirlerinde qar kóshkini qaýpi saqtalyp otyr, dep habarlaidy Dala news.
Tótenshe jaǵdailardyń aldyn alý maqsatynda TJM-niń «Qazseldenqorǵaý» mekemesiniń mamandary eldiń taýly aimaqtaryndaǵy kóshkin qaýpi bar ýchaskelerdi turaqty túrde baqylap, tekserý jumystaryn júrgizip jatyr.
2025 jyldyń qarasha aiynan bastalǵan kóshkin qaýpi kezeńinen beri respýblika boiynsha 331 jerústi tekserý júrgizilip, qar kóshkini júrýi múmkin oryndarǵa 110 eskertý belgisi ornatyldy. Halyqty aqparattandyrý úshin 1275 eskertý habarlamasy jáne 6103 aqparattyq broshiýra taratylǵan.
2025–2026 jyldardaǵy kóshkin qaýpi kezeńi bastalǵaly Almaty qalasy, Almaty jáne Jambyl oblystarynda 61 ózdiginen qar kóshkini túskeni tirkelgen.
Qaýipsizdikti qamtamasyz etý maqsatynda Almaty qalasy, Almaty jáne Shyǵys Qazaqstan oblystarynda 79 profilaktikalyq qar kóshkini túsirý jumysy júrgizildi.
Qazirgi ýaqytta eldiń ońtústigi men ońtústik-shyǵysyndaǵy taýly aimaqtarda, sondai-aq Shyǵys Qazaqstan oblysynyń taýlarynda kóshkin qaýpi saqtalyp otyr. Almaty oblysy men Jetisý oblysynyń taýlarynda qar jamylǵysynyń qalyńdyǵy kei jerlerde 1,4 metrge deiin jetip, bul qalypty kórsetkishten eki ese joǵary.
«Qazgidromet» boljamyna sáikes, 6–8 naýryz kúnderi Almaty, Túrkistan jáne Shyǵys Qazaqstan oblystarynyń taýly aimaqtarynda qar men boran túrindegi qatty jaýyn-shashyn kútiledi. Qar jamylǵysynyń turaqsyz bolýyna bailanysty ózdiginen qar kóshkini túsý qaýpi joǵary.
TJM azamattardy daýyldy eskertý jariialanǵan kezde taýly aimaqtarǵa barýdan bas tartýǵa, sondai-aq qar basqan tik betkeilerge shyqpaýǵa shaqyrady. Bul qar kóshkinine sebep bolýy múmkin.
