Toqaev tapsyrmasy respýblikanyń ár óńirinde buljytpai oryndalyp keledi. Sonyń bir dáleli, Almaty oblysynda bastaý alǵan «Táýelsizdik urpaqtary» granty.
Granttar Almaty oblysynyń azamatyna jańa ideialar men bastamalardy iske asyrý úshin konkýrstyq negizde taǵaiyndalady.
Atalǵan grant qarajaty ǵylymnyń basym sektorlarynda jańa ǵylymi jobalardy jáne zertteýlerdi iske asyrýǵa, Qazaqstannyń mádeni murasyn tanymal etýge, halyqtyq mádeni dástúrler men ónerdi ilgeriletýge baǵyttalǵan jobalar úshin, jańa IT sheshimder men jobalardy, onyń ishinde jańadan bastalǵan startap jobalardy ázirleýge, ekonomikanyń basym sektorlarynda jańa biznes-ideialardy shyńdaýǵa jáne jańa media jobalardy, onyń ishinde jastar úshin tanymdyq, paidaly, qyzyqty kontent qurý isine baǵyttalyp otyr.
Iaǵni, konkýrsqa qatysýshylar «Ǵylym», «Mádeniet», «Aqparattyq tehnologiialar», «Biznes», «Media» syndy baǵyttarda baqtaryn synai alady.
Aita keteiik, bul baiqaý Almaty oblysy Ishki saiasat basqarmasynyń muryndyq bolýymen ótkizilip otyr. Jalpy, uiymdastyrýshylardyń aitýynsha, grant berýdiń maqsaty belsendi shyǵarmashyl jastar qaýymdastyǵyn qalyptastyrýǵa baǵyttalǵan jastardyń jańa jáne qoldanystaǵy bastamalaryn memlekettik taaraptan qoldaý bolyp tabylady.
Aita keteiik, konkýrs eki kezeńde ótkiziledi:
1) birinshi kezeń – Basqarma konkýrstyq ótinimderdi qabyldaýy jáne erejege sáikestigin qaraýy;
2) ekinshi kezeń – konkýrstyq ótinimderdi baǵalaý jáne konkýrs jeńimpazdardyn anyqtaý.
Baiqaýǵa ótinimder memlekettik jáne orys tilinde qabyldanady. Qatysýshy, sharttarǵa sáikes, nysan boiynsha jobanyń sipattamasyn, Slaid túrindegi joba tanystyrylymyn jáne shyǵystar smetasynyń jobasy men bar bolǵan jaǵdaida ziiatkerlik menshik týraly málimetterdi qosa qamtýǵa tiis.
Konkýrstyq komissiianyń músheleri baiqaýǵa ótinimder usynylǵan kúnnen bastap 15 (on bes) jumys kúninen aspaityn merzimde baǵalaý paraǵy boiynsha konkýrstyq ótinimderdi baǵalaidy jáne konkýrs jeńimpazdaryn aiqyndaityn bolady.
Baiqaýda baby men baǵy qatar shapqan qatysýshy jeńimpaz atanady. Taǵaiyndalǵangrantty alý úshin, konkýrs jeńimpazy ekinshi deńgeidegi bankterde jeke shot ashý qajet.
Sondai-aq, konkýrstyq komissiianyń konkýrs jeńimpazdaryn aiqyndaý týraly hattamasyna qol qoiylǵan kúnnen bastap on jumys kúni ishinde Basqarmaǵa grantty aýdarý úshin banktik shottyń bar-joǵy jáne nómiri týraly anyqtamany usynýy shart.
Esterińzde bolsyn, basqarma konkýrstyq komissiianyń konkýrs jeńimpazdaryn anyqtaý týraly hattamasynyń negizinde konkýrs jeńimpazy banktik shottyń bar-joǵy jáne nómiri týraly anyqtamany usynǵannan keiin konkýrs jeńimpazymen shart jasasady.
Grant alýshyǵa qoiylatyn basty talap, jarty jylda bir ret jobanyń iske asyrylý barysy týraly esepti Basqarmaǵa usynady. Óz kezeginde basqarma kúntizbelik bir jyl ishinde grant qarajatynyń nysanaly paidalanylýyna, onyń ishinde grant alýshynyń usynǵan esebi boiynsha monitoringti júzege asyrady.
Granttyń nysanaly paidalanylmaǵany anyqtalǵan jaǵdaida Basqarma grant alýshyny shart talaptarynyń buzylǵany jáne granttyń tolyq somasyn qaitarý qajettigi týraly jazbasha nysanda habardar etýge quqyly ekenin qaperlerińizde ustańyzdar.
Aita keteiik, granttyń mólsheri men sanyn Almaty oblysynyń ákimdigi belgileidi. Bólingen grant qarajaty jobany iske asyrý úshin paidalanylady. Grantty paidalaný merzimi bir jyldan aspaidy.
Búgingi kúni qujat qabyldaý jumystary júrip jatyr. Baiqaýǵa qatysam deishiler 18 qarasha men 7 jeltoqsan aralyǵynda ótinim berýlerine múmkindigi bar.
Atalǵan baiqaýǵa Almaty oblysynyń 14 pen 28 jas aralyǵyndaǵy jastary qatysa alady. Qatysýshy árbir jasqa sáttilik serik bolǵai!
