Qazaq, orys jáne aǵylshyn tilderinde shyqqan kitaptyń elektrondy nusqasy qalyń oqyrmanǵa qoljetimdi. «Táýelsizdik týraly 100 áńgime» kitaby – 1991 jyldan bastap búgingi kúnge deiingi sońǵy úsh onjyldyqtaǵy Qazaqstan Táýelsizdiginiń jetistikterimen tikelei nemese janama bailanysty biregei oqiǵalar almanahy.
Kitaptaǵy spikerlerdiń kópshiligi tarihi oqiǵalardyń kýágeri bola otyryp, ózderiniń jeke estelikteri men emotsiialarymen bólisedi, el damýynyń árbir naqty kezeńiniń buryn belgisiz bolǵan sátterin eske alady.
Sonymen qatar, bul kitapta sońǵy 30 jyl ishindegi elimizde bolǵan ekonomikalyq, qoǵamdyq-saiasi jáne mádeni protsesterdi taldaityn salalyq sarapshylardyń pikirleri toptastyrylǵan. Áńgimelerde Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaevtyń tulǵasy erekshe oryn alady.
– Táýelsiz memleket qurý men qalyptastyrýdyń aýyrtpalyǵyn, qiyndyǵynyń aýqymyn sol kezeńdi kózimen kórip, tikelei qatysqandar ǵana naqty aita alady. Búginde kópshiligimiz úshin syn aitýǵa jeńil kórinetin elimizdiń búgingi jetken jetistigi – sóz joq, eń aldymen Tuńǵysh Prezident – Elbasymyz negizin qalaǵan memlekettik damýdaǵy syndarly saiasattyń arqasy ekeni daýsyz.
Elbasy negizin qalaǵan ishki saiasi turaqtylyq, ultaralyq kelisim men tatýlyq, áleýmettik-ekonomikalyq reformalar, syrtqy saiasattaǵy kóp vektorly ustanym syndy basym baǵyttar bizdiń basty qundylyqtarymyz bolyp qala beretini anyq. Biz alǵa qarai da úlken senimmen osy qalypta júrýimiz úshin – tarihymyzdy baǵalap, ótkenimizdi umytpaýymyz qajet.
Osy rette, «QazAqparat» AQ shyǵarǵan «Táýelsizdik týraly 100 áńgime» kitaby táýelsizdiktiń alǵashqy jyldarynyń estelikterinen syr shertedi. Kitapta Tuńǵysh Prezident, Elbasynyń sol kezeńderde seniminen shyǵyp, qasynan tabylǵan áriptesteri el damýyndaǵy mańyzdy sátterdi eske alyp, ózderiniń jeke estelikterimen bólisedi. Qazaq, orys jáne aǵylshyn tilderindegi kitap qalyń oqyrman qaýym úshin qyzyqty bolady dep senemin, – dedi QR Aqparat jáne qoǵamdyq damý ministri Aida Balaeva.
Kitap Qazaqstannyń kórnekti saiasatkerlerimen, ekonomisterimen, sondai-aq ǵylym, mádeniet jáne sport qairatkerlerimen ekskliýzivti suhbattar negizinde qurastyrylǵan. Onda QR birinshi Premer-Ministri Sergei Tereshenko, QR Parlamenti Senatynyń spikeri Máýlen Áshimbaev, QR Parlament Májilisiniń Tóraǵasy Nurlan Nyǵmatýlin, Tuńǵysh Prezident Keńsesiniń basshysy Mahmud Qasymbek, belgili memleket qairatkeri Qýanysh Sultanov jáne basqa da kóptegen saiasatkerler joba avtorlaryna ózderiniń jeke áserlerimen bólisken.
Kitap oqyrmandardyń keń aýqymyna, birinshi kezekte, Qazaqstannyń jańa tarihyna qyzyǵýshylyq tanytatyndarǵa arnalǵan.
Kitaptyń elektrondy nusqasyn https://100angime.kz/ saitynan oqyp tanysýǵa, kóshirip alýǵa bolady. Sondai-aq atalǵan saitta kitapqa áńgimeleri engen tulǵalar týraly da málimetter berilgen.
