قازاق، ورىس جانە اعىلشىن تىلدەرىندە شىققان كىتاپتىڭ ەلەكتروندى نۇسقاسى قالىڭ وقىرمانعا قولجەتىمدى. «تاۋەلسىزدىك تۋرالى 100 اڭگىمە» كىتابى – 1991 جىلدان باستاپ بۇگىنگى كۇنگە دەيىنگى سوڭعى ءۇش ونجىلدىقتاعى قازاقستان تاۋەلسىزدىگىنىڭ جەتىستىكتەرىمەن تىكەلەي نەمەسە جاناما بايلانىستى بىرەگەي وقيعالار الماناحى.
كىتاپتاعى سپيكەرلەردىڭ كوپشىلىگى تاريحي وقيعالاردىڭ كۋاگەرى بولا وتىرىپ، وزدەرىنىڭ جەكە ەستەلىكتەرى مەن ەموسيالارىمەن بولىسەدى، ەل دامۋىنىڭ ءاربىر ناقتى كەزەڭىنىڭ بۇرىن بەلگىسىز بولعان ساتتەرىن ەسكە الادى.
سونىمەن قاتار، بۇل كىتاپتا سوڭعى 30 جىل ىشىندەگى ەلىمىزدە بولعان ەكونوميكالىق، قوعامدىق-ساياسي جانە مادەني پروسەستەردى تالدايتىن سالالىق ساراپشىلاردىڭ پىكىرلەرى توپتاستىرىلعان. اڭگىمەلەردە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ تۇلعاسى ەرەكشە ورىن الادى.
– تاۋەلسىز مەملەكەت قۇرۋ مەن قالىپتاستىرۋدىڭ اۋىرتپالىعىن، قيىندىعىنىڭ اۋقىمىن سول كەزەڭدى كوزىمەن كورىپ، تىكەلەي قاتىسقاندار عانا ناقتى ايتا الادى. بۇگىندە كوپشىلىگىمىز ءۇشىن سىن ايتۋعا جەڭىل كورىنەتىن ەلىمىزدىڭ بۇگىنگى جەتكەن جەتىستىگى – ءسوز جوق، ەڭ الدىمەن تۇڭعىش پرەزيدەنت – ەلباسىمىز نەگىزىن قالاعان مەملەكەتتىك دامۋداعى سىندارلى ساياساتتىڭ ارقاسى ەكەنى داۋسىز.
ەلباسى نەگىزىن قالاعان ىشكى ساياسي تۇراقتىلىق، ۇلتارالىق كەلىسىم مەن تاتۋلىق، الەۋمەتتىك-ەكونوميكالىق رەفورمالار، سىرتقى ساياساتتاعى كوپ ۆەكتورلى ۇستانىم سىندى باسىم باعىتتار ءبىزدىڭ باستى قۇندىلىقتارىمىز بولىپ قالا بەرەتىنى انىق. ءبىز العا قاراي دا ۇلكەن سەنىممەن وسى قالىپتا ءجۇرۋىمىز ءۇشىن – تاريحىمىزدى باعالاپ، وتكەنىمىزدى ۇمىتپاۋىمىز قاجەت.
وسى رەتتە، «قازاقپارات» اق شىعارعان «تاۋەلسىزدىك تۋرالى 100 اڭگىمە» كىتابى تاۋەلسىزدىكتىڭ العاشقى جىلدارىنىڭ ەستەلىكتەرىنەن سىر شەرتەدى. كىتاپتا تۇڭعىش پرەزيدەنت، ەلباسىنىڭ سول كەزەڭدەردە سەنىمىنەن شىعىپ، قاسىنان تابىلعان ارىپتەستەرى ەل دامۋىنداعى ماڭىزدى ساتتەردى ەسكە الىپ، وزدەرىنىڭ جەكە ەستەلىكتەرىمەن بولىسەدى. قازاق، ورىس جانە اعىلشىن تىلدەرىندەگى كىتاپ قالىڭ وقىرمان قاۋىم ءۇشىن قىزىقتى بولادى دەپ سەنەمىن، – دەدى ق ر اقپارات جانە قوعامدىق دامۋ ءمينيسترى ايدا بالايەۆا.
كىتاپ قازاقستاننىڭ كورنەكتى ساياساتكەرلەرىمەن، ەكونوميستەرىمەن، سونداي-اق عىلىم، مادەنيەت جانە سپورت قايراتكەرلەرىمەن ەكسكليۋزيۆتى سۇحباتتار نەگىزىندە قۇراستىرىلعان. وندا ق ر ءبىرىنشى پرەمەر-مينيسترى سەرگەي تەرەششەنكو، ق ر پارلامەنتى سەناتىنىڭ سپيكەرى ماۋلەن اشىمبايەۆ، ق ر پارلامەنت ءماجىلىسىنىڭ ءتوراعاسى نۇرلان نىعماتۋلين، تۇڭعىش پرەزيدەنت كەڭسەسىنىڭ باسشىسى ماحمۇد قاسىمبەك، بەلگىلى مەملەكەت قايراتكەرى قۋانىش سۇلتانوۆ جانە باسقا دا كوپتەگەن ساياساتكەرلەر جوبا اۆتورلارىنا وزدەرىنىڭ جەكە اسەرلەرىمەن بولىسكەن.
كىتاپ وقىرمانداردىڭ كەڭ اۋقىمىنا، ءبىرىنشى كەزەكتە، قازاقستاننىڭ جاڭا تاريحىنا قىزىعۋشىلىق تانىتاتىندارعا ارنالعان.
كىتاپتىڭ ەلەكتروندى نۇسقاسىن https://100angime.kz/ سايتىنان وقىپ تانىسۋعا، كوشىرىپ الۋعا بولادى. سونداي-اق اتالعان سايتتا كىتاپقا اڭگىمەلەرى ەنگەن تۇلعالار تۋرالى دا مالىمەتتەر بەرىلگەن.
