Munan soń mektep oqýshylary daıyndaǵan merekelik shara bastalyp, «Atameken» hor ujymy «Meniń Otanym» ánimen saltanatty jıynnyń shymyldyǵyn túrdi.
Sondaı-aq QR Táýelsizdigi kúni Otyrar aýdanyndaǵy Temir aýyldyq mádenıet úıinde de erekshe saltanatpen atalyp ótti. Temir jalpy orta mektebi ujymynyń uıymdastyrýymen ótken «Táýelsizdik tutqasy bizge amanat» atty saltanatty jıynda mekteptiń «Ájeler alqasynan» quralǵan «Aq ájeler» ansambli tamasha ándi tartý etse, «halyq aspaptary» orkestri kúmbirlegen kúı tartyp, mekteptiń ónerpaz oqýshylary patrıottyq ánderdi shyrqady.
Merekelik sharada sóz alǵan Otyrar aýdany ákimi Erlan Aıtahanov:
– Memleket basshysy Nursultan Nazarbaev taıaýda ǵana jarıalaǵan «Uly dalanyń jeti qyry» atty maqalasynda «Óz tarıhyna degen maqtanysh sezimin uıalatyp, otanshyldyq tárbıe berý mektep qabyrǵasynan bastalýǵa tıis. Sondyqtan mektepter men barlyq óńirlerdegi ólketaný mýzeıleriniń janynan tarıhı-arheologıalyq qozǵalystar qurý mańyzdy. Ult tarıhyn sanaǵa sińirý barsha qazaqstandyqtardyń boıynda óz bastaýlaryna degen ortaqtyq sezimin qalyptastyrady, – dep sanaly urpaq tárbıesine kóńil bólý qajettigin erekshe atap ótti.
Iaǵnı, tarıhı jádigerlerimiz ben baı muralarymyzdy óskeleń urpaqqa keńinen nasıhattap, jastardy ótken tarıhymyzdy tanýǵa tárbıeleýdiń mańyzdylyǵy zor. Osy baǵytta kezinde aty álemge máshhúr bolǵan dańqty Otyrar qalasynnyń orny búginde sonaý jyldardan syr shertetin tarıhı orynǵa aınalyp otyr.
– Elbasymyzdyń maqalasynda aıtylǵan mindetterdi júzege asyrý maqsatynda jasalǵan otyrarlyq qaharmandardyń erligin dáripteıtin «Kóne qumyranyń syry» atty anımasıalyq fılmniń balalarǵa berer áseri mol. Aldaǵy ýaqytta basqa da jobalardy qolǵa alý josparymyzda bar. Osynyń bári shyndap kelgende Táýelsiz elimizdiń 27 jyl ishinde jetken jetistigi dep bilemin, – dep sharaǵa qatysýshylardy Táýelsizdik kúni merekesimen quttyqtady.
Táýelsizdiktiń alǵashqy jyldarynan-aq elimiz egemendiktiń eń negizgi alǵy sharttaryn jasaı aldy. Bárinen buryn kóp ultty, kóptildi, kóp dindi elde halyqtyń aýyz birligin saqtaýǵa qol jetkizildi. Qazaqstandy meken etken barlyq ulttardyń múddesin ortaqtastyra alǵany – Elbasymyzdyń danalyq saıasatynyń aıqyn aıǵaǵy edi.
Ásem án men tátti kúı, ulttyq kıim kıgen qyzdardyń myń buralǵan bıine ulasqan saltanatty jıyn konserttik baǵdarlamaǵa ulasyp, táýelsizdigimizdiń 27 jyldyq tarıhymyzdy aıshyqtaıtyn sazdy kompozısıalyq kórinispen jalǵasyn.
Dalanews.kz
