Qazaqstandyq boksshy Sáken Bibosynov jattyǵý kezinde aýyr jaraqat alyp, aýrýhanaǵa tústi. Bul týraly sport jýrnalisi Aslan Qajenov áleýmettik jelidegi paraqshasynda jazdy, dep habarlaidy dalanews.kz.
Onyń málimetinshe, boksshynyń omyrtqasyna zaqym kelgen. Osyǵan bailanysty Sáken Bibosynov 29 qazanda Tarazda bastalatyn bokstan Qazaqstan chempionatyna qatyspaidy.
«Ókinishke orai, keshe jattyǵý barysynda aýyr jaraqat alyp, aýrýhanaǵa tústi. Omyrtqasyna zaqym keldi. Tezirek saýyǵyp ketýin tileimiz», – dep jazdy Aslan Qajenov.
Jýrnalist aldaǵy el chempionatyna qatysty da birqatar málimetti bólisti. Onyń aitýynsha, Aziia oiyndarynda júldege ilikken Mahmud, Tórehan jáne Aibek týrnirge qatyspaidy. Nurbek te úzilis alǵan.
Qyzdar quramasynan Alýa men Natalia sharshy alańǵa shyqpaidy.
Qajenovtyń sózinshe, qalǵan boksshylardyń barlyǵy ishki birinshilikke qatysýǵa tiis. Qazaqstan chempionatynda ózin jaqsy qyrynan kórsetken sportshylar ǵana ulttyq quramaǵa iriktelmek.
«Sol jerde óz myqtylyǵyn dáleldegender ǵana ulttyq quramaǵa alynady. Óte qyzyqty ári tartysty jekpe-jekter kútip tur», – dep jazdy ol.
Bokstan Qazaqstan chempionaty 29 qazanda Taraz qalasynda bastalady.
