«Halyq úni» táýelsiz baqylaýshylar toby Quryltai depýtattarynyń sailaýyn qoǵamdyq baqylaýmen qamtamasyz etip, daýys berý protsesiniń ashyqtyǵy men daýystardyń ádil eseptelýine yqpal etýdi maqsat etip otyr. Bul týraly birlestik ókilderi Almatyda ótken baspasóz konferentsiiasynda málimdedi, dep habarlaidy dalanews.kz.
Top jetekshisi Nurbolat Nyshanbaevtyń aitýynsha, birlestiktiń qyzmeti saiasi beitaraptyq, táýelsizdik jáne qoǵamdyq baqylaýdyń obektivtiligi qaǵidattaryna negizdeledi. Negizgi mindet – sailaý zańnamasynyń saqtalýyn, sailaý naýqanyna qatysýshylar úshin teń jaǵdaidyń qamtamasyz etilýin jáne árbir berilgen daýystyń zań talaptaryna sai durys eseptelýin qoǵamdyq baqylaý.
Qazirgi ýaqytta birlestik qoǵamdyq baqylaýshylardy daiarlaý jumystaryna kiristi. Oqytý baǵdarlamasy olardyń quqyqtary men mindetterin, sailaý zańnamasynyń talaptaryn, daýys berý men biýlletenderdi sanaý tártibin, sondai-aq sailaý ýchaskelerinde týyndaýy múmkin túrli jaǵdailarda áreket etý algoritmderin qamtidy. Qatysýshylar arnaiy ádistemelik materialdarmen jáne elektrondyq nusqaýlyqtarmen qamtamasyz etiledi.
Baqylaý jumysyna belsendi ári jaýapty azamattardy, onyń ishinde jastardy tartý josparlanyp otyr. Birlestik ókilderiniń pikirinshe, azamattyq qoǵamnyń sailaý protsesine tikelei qatysýy onyń ashyqtyǵyn arttyryp, daýys berý qorytyndylaryna degen qoǵamdyq senimdi nyǵaitady.
Top ókilderi táýelsiz qoǵamdyq baqylaý saiasi ustanymdarǵa nemese sailaý nátijesine táýeldi bolmaýy tiis ekenin atap ótti. Olardyń aitýynsha, basty basymdyq qai saiasi kúshtiń jeńiske jetetinine qaramastan, barlyq biýlletenniń ádil, ashyq ári obektivti eseptelýin qamtamasyz etý.
Sondai-aq qoǵamdyq baqylaýshylardyń jumysy tek daýys berý kúnindegi protsesti tirkeýmen shektelmeitini aityldy. Ýchaskelerde jinaqtalǵan tájiribe sailaý zańnamasynyń qoldanylý tájiribesin taldaýǵa, ózekti máselelerdi anyqtaýǵa jáne sailaý rásimderin jetildirýge baǵyttalǵan usynystar ázirleýge múmkindik beredi.
Baspasóz konferentsiiasyna saiasattanýshylar Beknur Kisikov, Ermurat Bápi, Dos Kóshim, sondai-aq jýrnalist ári saiasattanýshy Nurgeldi Ábdiǵani qatysty.
