Talantty jas boksshyny, onyń jattyqtyrýshylary Nurlan Tájibaev pen Sultan Týǵanbekovty qalalyq boks jáne fýtbol federatsiiasynyń prezidenti, sport janashyry Ertai Dúisebaev quttyqtap, izgi tilegin jetkizdi. Jigerin qairap, shashbaýyn kóterdi. Aǵalyq rizashylyǵyn bildirip, syi-syiiapat kórsetti. Ardager sportshy, Qazaqstanǵa eńbegi sińgen jattyqtyrýshy Turarbek Omarov qala sportynyń damýyna úles qosyp, qalamyzdyń atyn áigilep júrgen jas boksshydan úlken úmit kútetinin aityp, aldaǵy qadamdaryna sáttilik, jemisti jetistikter tiledi.
Ataqty boksshy, KSRO-ǵa eńbegi sińgen sport sheberi Ábdisalam Nurmahanovtyń atynda jyl saiyn uiymdastyrylyp kele jatqan týrnir biyl Táýelsizdiktiń 30 jylymen tuspa-tus keldi. 14-17 sáýirde Túrkistanda ótken dúbirli dodaǵa Qytai, Ózbekstan, Qyrǵyzstan jáne Qazaqstan sportshylarynan 150-ge tarta adam qatysty. Saidyń tasyndai iriktelgen sańlaqtardyń ishinen kózge túsip, 49 keli salmaqta judyryqtasqan Darynnyń shapshańdyǵy, júrektiligi men ekpindi soqqylary qarsylastaryn qaimyqtyrdy. Sharshy alańda degbirin qashyrmai, aiaǵyn nyq basyp, árbir judyryǵyn nysanaǵa týra baǵyttap, tóreshilerdiń joǵary baǵasyn ielendi.
Bul – onyń eresekter arasynda ótken bási biik báseken alǵan alǵashqy altyn medali. Jas boksshy kóterińki kóńil kúimen:
«Osy jolǵy jeńistiń men úshin jóni bólek. Eresekter qataryna basqan alǵashqy sátti qadamym. Táýelsizdigimizdiń 30 jyldyǵynda jetken biik jetistigim. Ol meni qanattandyrady, jigerlendiredi!» dedi.
Daryn – táýelsizdiktiń túlegi. Kók týymyzdyń astynda er jetken oiy erkin, boiy shymyr, jigerli jas. Onyń baǵyndyrar biikteri áli alda.
Uljan ULDAHANQYZY,
Tekeli qalasy ákiminiń
baspasóz hatshysy
