تالانتتى جاس بوكسشىنى، ونىڭ جاتتىقتىرۋشىلارى نۇرلان تاجىبايەۆ پەن سۇلتان تۋعانبەكوۆتى قالالىق بوكس جانە فۋتبول فەدەراسياسىنىڭ پرەزيدەنتى، سپورت جاناشىرى ەرتاي دۇيسەبايەۆ قۇتتىقتاپ، ىزگى تىلەگىن جەتكىزدى. جىگەرىن قايراپ، شاشباۋىن كوتەردى. اعالىق ريزاشىلىعىن ءبىلدىرىپ، سىي-سىيياپات كورسەتتى. ارداگەر سپورتشى، قازاقستانعا ەڭبەگى سىڭگەن جاتتىقتىرۋشى تۇراربەك وماروۆ قالا سپورتىنىڭ دامۋىنا ۇلەس قوسىپ، قالامىزدىڭ اتىن ايگىلەپ جۇرگەن جاس بوكسشىدان ۇلكەن ءۇمىت كۇتەتىنىن ايتىپ، الداعى قادامدارىنا ساتتىلىك، جەمىستى جەتىستىكتەر تىلەدى.
اتاقتى بوكسشى، كسرو-عا ەڭبەگى سىڭگەن سپورت شەبەرى ءابدىسالام نۇرماحانوۆتىڭ اتىندا جىل سايىن ۇيىمداستىرىلىپ كەلە جاتقان تۋرنير بيىل تاۋەلسىزدىكتىڭ 30 جىلىمەن تۇسپا-تۇس كەلدى. 14-17 ساۋىردە تۇركىستاندا وتكەن ءدۇبىرلى دوداعا جۇڭگو، وزبەكستان، قىرعىزستان جانە قازاقستان سپورتشىلارىنان 150-گە تارتا ادام قاتىستى. سايدىڭ تاسىنداي ىرىكتەلگەن ساڭلاقتاردىڭ ىشىنەن كوزگە ءتۇسىپ، 49 كەلى سالماقتا جۇدىرىقتاسقان دارىننىڭ شاپشاڭدىعى، جۇرەكتىلىگى مەن ەكپىندى سوققىلارى قارسىلاستارىن قايمىقتىردى. شارشى الاڭدا دەگبىرىن قاشىرماي، اياعىن نىق باسىپ، ءاربىر جۇدىرىعىن نىساناعا تۋرا باعىتتاپ، تورەشىلەردىڭ جوعارى باعاسىن يەلەندى.
بۇل – ونىڭ ەرەسەكتەر اراسىندا وتكەن ءباسى بيىك باسەكەن العان العاشقى التىن مەدالى. جاس بوكسشى كوتەرىڭكى كوڭىل كۇيمەن:
«وسى جولعى جەڭىستىڭ مەن ءۇشىن ءجونى بولەك. ەرەسەكتەر قاتارىنا باسقان العاشقى ءساتتى قادامىم. تاۋەلسىزدىگىمىزدىڭ 30 جىلدىعىندا جەتكەن بيىك جەتىستىگىم. ول مەنى قاناتتاندىرادى، جىگەرلەندىرەدى!» دەدى.
دارىن – تاۋەلسىزدىكتىڭ تۇلەگى. كوك تۋىمىزدىڭ استىندا ەر جەتكەن ويى ەركىن، بويى شىمىر، جىگەرلى جاس. ونىڭ باعىندىرار بيىكتەرى ءالى الدا.
ۇلجان ۇلداحان قىزى،
تەكەلى قالاسى اكىمىنىڭ
باسپا ءسوز حاتشىسى
