Almaty qalalyq sotynyń qylmystyq ister jónindegi sot alqasy Tatiana Belovaǵa qatysty birinshi satydaǵy sottyń úkiminiń kúshin joiyp, jańa aiyptaý úkimin shyǵardy, dep habarlaidy dalanews.kz.
Belova bopsalaý jáne kórineý jalǵan sóz jetkizý (kórineý jalǵan aryz berý) epizodtary boiynsha kináli dep tanyldy. Oǵan ortasha qaýipsizdik mekemesinde jazasyn óteýmen jeti jyl merzimge bas bostandyǵynan aiyrý jazasy taǵaiyndaldy.
Aita ketý kerek, Almatyda bir jyldan beri kásipker Vladislav Lihachev pen onyń burynǵy enesi jáne áieli arasyndaǵy sot daýy jalǵasatyn boldy. Búgin Almatyda ótken baspasóz konferentsiiasynda burynǵy enesi Liliia Anoshina men zańger Tatiana Belovadan zardap shektim degen reseilik azamat appeliiatsiialyq shaǵym túsirgenin málimdedi. Joǵarydaǵy eki tulǵaǵa qatysty qozǵalǵan qylmys is negizinde Almaty qalasynyń Qylmystyq ister jónindegi mamandandyrylǵan aýdanaralyq soty 2026 jylǵy 21 mamyrda úkim shyǵarǵan. Sot Tatiana Belovany eki bap boiynsha kináli dep taýyp, taǵy bir bap boiynsha aqtap shyqqan
Buǵan deiin birinshi satydaǵy sot Belovany bopsalaý aiyby boiynsha aqtap, ony tek kórineý jalǵan sóz jetkizý qylmysyn jasaǵany úshin kináli dep tanyp, shartty jaza taǵaiyndaǵan bolatyn. Jábirlenýshi tarap bul sheshimmen kelispei, sottyń dáleldemeler men istiń naqty mán-jailaryna tolyqqandy quqyqtyq baǵa bermegenin kórsetip, apelliatsiialyq shaǵym túsirdi.
Apelliatsiialyq sot alqasy jábirlenýshilerdiń advokattary keltirgen negizgi ýájdermen kelisip, Belovanyń bopsalaýǵa járdemdeskeni dáleldendi degen qorytyndyǵa keldi.
Sot alqasy Tatiana Belovanyń jábirlenýshi týraly jaǵymsyz sipattaǵy materialdardy daiyndap, olardy Liliia Anoshinaǵa bergenin anyqtady. Keiinnen bul materialdar buqaralyq aqparat quraldarynda jariialanyp, jábirlenýshige qysym kórsetý maqsatynda paidalanylǵany belgili boldy.
Sonymen qatar, sot alqasy lianoshina@proton.me elektrondyq poshta mekenjaiynyń Liliia Anoshinaǵa tiesili ekenin naqty anyqtady. Ol atalǵan qylmystyq is boiynsha kúdikti dep tanylyp, halyqaralyq izdeýge jariialanǵan edi.
Jábirlenýshilerdiń advokaty Aleksandr Borisenkovtyń aitýynsha, sot alqasy shyǵarǵan úkim zańdylyqtyń qalpyna keltirilýin qamtamasyz etip, birinshi satydaǵy sot tiisti deńgeide nazar aýdarmaǵan dáleldemelerge laiyqty quqyqtyq baǵa berdi.
“Tintý júrgizý barysynda Tatiana Belovanyń jumys kabinetinde ózine tiesili monoblok tárkilendi. Qazaqstan Respýblikasy Ulttyq qaýipsizdik komiteti júrgizgen saraptama nátijesinde joiylǵan faildar qalpyna keltirildi. Atalǵan faildarda meniń senim bildirýshimniń ar-namysy men qadir-qasietine nuqsan keltiretin jaǵymsyz málimetter bolǵan. Belova bul faildardy tergeý organdarynan jasyrýǵa áreket jasaǵan”,– deidi advokat.
Belova dál osy materialdardy óziniń sybailasy Liliia Anoshinaǵa bergen. Keiinnen bul materialdar jábirlenýshige iri kólemdegi aqsha qarajatyn berýdi talap etken ári qorqytý sipatyndaǵy hattardy ázirleýge negiz bolǵan. Sarapshy mamannyń qorytyndysyna sáikes, atalǵan materialdardaǵy málimetter jábirlenýshiniń ar-namysy men qadir-qasietine nuqsan keltiredi. Sondai-aq olardyń jábirlenýshige joldanǵan qorqytyp-úrkitý hattarynda qamtylǵan málimettermen birdei ekendigi dáleldengen.
Sot alqasy Qazaqstan Respýblikasy men Resei Federatsiiasynyń zańdy kúshine engen birqatar sot sheshimderin nazarǵa aldy. Osy sot aktilerimen atalǵan málimetterdiń barlyǵynyń shyndyqqa sáikes kelmeitini, iaǵni jalǵan ekendigi anyqtalǵan. Jaqynda jábirlenýshi Vladislav Lihachev pen onyń advokattary kúdikti Belovany Qazaqstan Respýblikasy Qylmystyq kodeksiniń 190-babynyń 4-bóliginiń 2-tarmaǵynda kózdelgen alaiaqtyq epizody boiynsha da kináli dep tabýdy suraǵan.
Jábirlenýshi dep tanylǵan kásipker óz aryzy negizinde 200 myń AQSh dollarynan astam qarajattyń qaitarylmaýyna bailanysty qylmystyq is qozǵaýdy talap etip QR Bas prokýroryna aryz jazǵan. Al 2024 jyly kerisinshe onyń enesi Aniýshina men onyń tanysy Belova Reseide turatyn kásipkerdiń ózin aiyptap, quqyq qorǵaý organdaryna aryzdanǵan. Lihachevke qarsy Qazaqstanda qylmystyq is qozǵalyp, oǵan izdeý jarialanady. Politsiiaǵa ózi kelip túsinikteme bergen soń, tártip saqshylary onyń burynǵy enesi Liliia Anoshina men oǵan zańgerlik qyzmet kórsetetin Tatiana Belovaǵa qatysty úsh bappen is qozǵady. Bopsalaý, alaiaqtyq jáne quqyq qorǵaý organdaryna kórneý jalǵan aqparat bergen degen baptarmen bul is sotqa joldanady.
Lihachevtiń aitýynsha, kólemi 250 myń AQSh dollaryn áieliniń anasy Aniýshina men zańger Belovaǵa shtelden 5 avtokólik ákelý úshin bergen. Alaida bul qarajatty óz paidalaryna jaratqan eki áiel Lihachevtiń ózine jala jaýyp, tergeý organdaryna jalǵan málimetter bergen. Sóitip kólik ákelip satýdy josparlaǵan biznesmendi qorqytyp-úrkitken. Ony dáledeitin aýdiojazbalar men ózge de dálelder saralanyp, bul is boiynsha Vladislav Lihachev jábirlenýshi dep tanyldy.
