TASS agenttiginiń bas direktory Andrei Kondrashov II dárejeli “Dostyq” ordenimen marapattaldy, dep habarlaidy Dalanews.kz.
Atalmysh ordendi reseilik jýrnaliske Qazaqstannyń Memlekettik keńesshisi Erlan Qarin tabystady. Kondrashov bul marapatty Qazaqstan men Resei arasyndaǵy qarym-qatynasty damytýǵa qosqan úlesi úshin ielendi.
Óz sózinde jýrnalist mártebeli qonaqtarǵa alǵys bildire otyryp, orden búkil agenttiktiń eńbegine berilgen joǵary baǵa ári bolashaqqa artylǵan senimniń belgisi ekenin atap ótti.
Aita keteiik, Máskeýde Reseidiń TASS aqparat agenttiginiń qurylǵanyna 120 jyl tolýyna orai “Resei-Qazaqstan: BAQ-tyń ózara árekettesýiniń ózekti máseleleri” atty media forýmy ótti.
Is-sharaǵa Memlekettik keńesshi Erlan Qarin, Parlament Májilisi Tóraǵasynyń orynbasary Daniia Espaeva, Qazaqstannyń Reseidegi Tótenshe jáne ókiletti elshisi Dáýren Abaev, Syrtqy ister ministriniń orynbasary Roman Vasilenko, Prezident teleradiokesheniniń bas direktory Raýshan Qajybaeva jáne elimizdiń iri mediaholdingteri men BAQ jetekshileri arnaiy bardy.
