Qarjy ministrliginiń baspasóz hatshysy Arai Dáýletqyzy OKQ brifinginde tótenshe jaǵdaiǵa bailanysty ár otbasyna qandai kómek kórsetiletini týraly aitty, dep habarlaidy Dalanews.kz.
Onyń sózinshe, osy maqsatta úkimet sý tasqyny saldaryn joiý jónindegi is-sharalardy qarjylandyrý josparyn bekitti.
Josparǵa sáikes, árbir zardap shekken otbasyna 100 AEK mólsherinde birjolǵy ótemaqy beriletin bolady. Qiraǵan úiler úkimet rezervi esebinen qaita salynady. Óńirlerge qarajat ónerkásip jáne qurylys ministrligi arqyly baǵyttalady.
Jóndeýdi qajet etetin úiler ákimdikterdiń qarajaty esebinen qalpyna keltiriledi. Zalaldy baǵalaýdy ákimdikter sý ketkennen keiin birden júrgizedi. Saiajai úileri boiynsha ótemaqy mólsheri 100 AEK deiin quraidy.
"Bul rette, eger saiajai jalǵyz turǵyn úi bolyp tabylsa nemese zardap shekkender halyqtyń áleýmettik osal toptary sanatyna jatatyn bolsa, ákimdikter balamaly turǵyn úi berý múmkindigin qarastyratyn bolady. Aýyl sharýashylyǵy janýarlary boiynsha shyǵyndardy óteý jergilikti atqarýshy organdardyń qarajaty esebinen júrgiziletin bolady.
Jergilikti atqarýshy organdardyń tizimderine sáikes sý tasqynynan zardap shekkender sanatyna jatqyzylǵan barlyq azamattarǵa bankter men mikroqarjylyq uiym bólimshelerine barmai-aq kreditter boiynsha tólemderdi 3 ai merzimge (2024 jylǵy 1 sáýirden 30 maýsymǵa deiin) avtomatty túrde keiinge qaldyrylady", – dedi spiker.
Spikerdiń aitýynsha, zardap shekken halyqtyń tizimderin jáne zalaldy baǵalaýdy ákimdikter qalyptastyrady jáne júrgizedi. Zardap shekken múliktiń tizimimen birge bir mezgilde quqyq belgileitin qujattardyń kóshirmeleri bolǵan jón.
