«Dara» daryndylardy qoldaý qorynyń uiymdastyrýymen jáne Túrkistan oblysy ákimdiginiń qoldaýymen ótken dúbirli synǵa 270-ke jýyq adam qatysty. Olardyń arasynda 3 egiz sportshy da boldy. Jarysty uiymdastyrýǵa Túrkistan oblystyq «Jastar resýrstyq ortalyǵy» airyqsha úles qosty.
Jalpy túrkistandyqtar arasynda týrnikke eń kóp tartylý kórsetkishi 36 boldy. Bul kórsetkishke 18-30 jas aralyǵyndaǵy úmitkerler saiysynda baq synaǵan Qasymbek Nurjigit qol jetkizdi.
18 jasqa deiingiler arasynda Qudiret Ázretáli, Shahizinda Berik jáne Rahmatýlla Mustafa top jeńimpaz boldy. Olarǵa 200 myń teńge aqshalai syilyq tapsyryldy.
18-30 jas aralyǵyndaǵy saiysta Zýlqainarov Jumadýlla, Qasymbek Nurjigit jáne Ádilov Dosbolat jeńimpaz atandy. Al 30 jastan úlkender arasyndaǵy synda Oryntai Nurbolat, Janǵali Áljanov jáne Erbolat Bimýrzaevtyń mereii ústem boldy.
Sonymen birge ekinshi jáne úshinshi oryn alǵan jalpy 18 sportshy marapattaldy. Birqatar qatysýshyǵa arnaiy marapattar usynyldy. Múmkindigi shekteýli jan Daniiar Majitov pen saiystyń eń jasy úlken úmitkeri Dadajan Súleimenovke jáne eń jas qatysýshy Nadiia Sadyqovaǵa arnaiy syilyqtar berildi.
Jalpy saiysta Túrkistan óńiriniń bilekti, júrekti órenderi týrnikke 4575 ret tartyldy. Alty jastaǵy baladan bastap 70 jastan asqan úmitkerler qatysqan doda 4 saǵatqa sozyldy.
Saiystyń 9 jeńimpazy Nur-Sultan qalasynda ótetin grand-finalǵa joldama aldy. Al ol synda jeńiske jetse, Street Workout jattyǵýlary boiynsha álem chempionatyna qatysady. Óte joǵary deńgeide uiymdastyrylǵan sporttyq báseke tanymal ánshi Miras Júginisovtiń kontsertimen túiindeldi.
