Qazaqstannyń erler quramasy qylyshtyń shpaga túrinen alǵash ret álem chempionatyn jeńip aldy, dep habarlaidy dalanews.kz tengrisport.kz-ke silteme jasap.
Qytaidyń Gonkong qalasynda ótken álem chempionatynyń finalynda qazaqstandyqtar Ýkraina quramasymen kezdesti. Finaldyń ereksheligi Qazaqstan quramasyna ýkrainalyq maman Aleksandr Gorbachýk jetekshilik etti.
Finalda el namysyn Vadim Sharlaimov, Erlik Sertai, Kirill Prohodov jáne Rýslan Kýrbanov qorǵady.
Final qalai ótti?
Kezdesýdiń alǵashqy bóliginde eki komanda bir-biriniń taktikasyn baqylap, passivti áreketi úshin ekeýi de eskertý aldy. Degenmen jekpe-jektiń alǵashqy úshten birinen keiin Qazaqstan quramasy eki upai aiyrmasymen alǵa shyqty.
Kezdesýdiń ortasynda Vadim Sharlaimov aiaǵyn jaraqattap alyp, dárigerdiń kómegine júgindi. Soǵan qaramastan bas bapker ony almastyrmai, úzilisten keiin sportshy qarsylasynan tórt upai uzap ketti.
Alaida matchtyń sońyna qarai Ýkraina quramasy esep aiyrmasyn eki upaiǵa deiin qysqartty.
Jaraqatyna bailanysty Vadim Sharlaimov finaldaǵy sońǵy jekpe-jekke qatysa almady. Onyń ornyna álem chempionattarynda jeke medal jeńip alǵan Qazaqstandaǵy jalǵyz semserlesýshi Rýslan Kýrbanov shyqty.
Sheshýshi aiqas aldynda Qazaqstan quramasy bes upai aiyrmasymen alda boldy. Sońǵy jekpe-jekke 19 jastaǵy Kirill Prohodov shyǵyp, jaýapkershilikti abyroimen eńserip, komandanyń jeńisin qamtamasyz etti.
Qorytyndy esep – 45:40, Qazaqstannyń paidasyna.
Altynǵa aparar jol
Álem chempionaty bastalar aldynda Qazaqstan quramasy dúniejúzilik reitingte besinshi orynda turǵan. Sondyqtan bul jeńisti kópshilik kútpegen sensatsiia dep baǵalap otyr.
Altyn medalǵa deiingi jolda qazaqstandyqtar Finliandiia, Ózbekstan, Daniia jáne Mysyr quramalaryn jeńdi. Eń tartysty kezdesý Ózbekstan komandasyna qarsy ótti. Sol matchta Qazaqstan quramasy esepte qalyp kele jatyp, sońǵy sátte bir ǵana dál soqqynyń arqasynda jeńiske jetti.
Qola júldeni jartylai finalda Qazaqstannan jeńilgen Mysyr quramasy ielendi.
Aita keteiik, buǵan deiin Qazaqstan quramasynyń álem chempionattaryndaǵy eń joǵary jetistigi byltyr Grýziiada ótken jarysta jeńip alǵan qola medal bolatyn.
Tarihi jeńisten keiin komanda kóshbasshysy Rýslan Kýrbanov Tengri Sport-qa bergen suhbatynda Qazaqstandaǵy semserlesý sportynyń damýy týraly pikir bildirdi.
