Taraz qalasy ákimi Nurjan Kalenderovtyń nazaryna!
Jańa jylda oryn alady-mys degen tańǵajaiypqa kez kelgen bala senetini anyq. Biyl sol senimge selkeý túskendei... Búginde jergilikti jerlerde ákimderdiń qatysýymen Prezidenttik shyrsha uiymdastyrylyp, oǵan áleýmettik jaǵdaiy tómen otbasylardyń balalary men jetim balalar qatysyp, Elbasynyń atynan beriletin syilyqty qushaqtap, úilerine arqa-jarqa bolyp oralatyn jaqsy ádet qalyptasqan edi.
Taiaýda dál osyndai Prezidenttik shyrsha Taraz qalasynda uiymdastyrylyp, balalar án salyp, bi bilep, ónerlerin kórsetip, syilyqtaryn alǵanyn jergilikti aqparat quraldary jarysa jazdy. Osy shara barysynda Taraz qalasynyń ákimi Nurjan Kalenderov myrza merekelik sharaǵa qatysqan balǵyndarǵa bir-bir uialy telefonnan berip máz qylǵan-dy. Ókinishke orai, balalardyń qýanyshy kópke barmady. Muny bizge qala ákiminiń qolynan balasy syilyq alǵan ata-ana áńgimelep berdi. Aty-jónin atamaýdy ótingen ata-ana bylai dedi:
– Jańa jyl qarsańynda balam qala ákiminiń qolynan uialy telefon alyp úige qýanyp keldi. Ulym fýtbolǵa qatysýshy edi. Ol: «Mama, endi basqa qalalarǵa jarysqa barǵanda sýretke túsirip, saǵan ákelip kórsetemin» dep sýdai jańa uialy telefonynyń qorabyn asha bastady. Ádemi qara-kúlgin telefon kózdiń jaýyn alady. Toqqa qýattandyrǵannan keiin qosqan soń, qýanyshymyz sý sepkendei basyldy. Telefon tek qońyraý shalýǵa ǵana jaraidy eken. Ishindegi mázirleriniń eshqaisysy istemeidi. Osylaisha Jańa jyl qarsańynda ákimnen aldanǵan balam ne jylaryn, ne kúlerin bilmei dal boldy, – deidi .
Balasy jylarman kúige túskennen keiin ol qalalyq ákimdikke baryp mán-jaidy baiandaidy. Ondaǵylar ádettegidei mundai jaisyz jaǵdai boiynsha ózderine eshkim shaǵym aityp kelmegenin, Jańa jylda balalarǵa syilyq alýdy Taraz qalalyq bilim bólimine tapsyrǵandaryn aityp, shyǵaryp salypty.
Ata-ana bilim bóliminiń býhgalteriiasyna barǵanda úiilip jatqan «jarymjan» sotkalardy kóredi. Ol ózge ata-analarmen sóileskende sotkalardyń keibireýiniń ekrandary múlde qosylmaitynyn estigen.
Aitpaqsha, eń qyzyǵy Tarazdaǵy balalarǵa syilyǵyn Taraz qalalyq bilim bólimi Aqtóbedegi bir kásipkerlerden satyp alsa kerek. Redaktsiiamyzǵa habarlasqan ata-ana saýda oryndaryna barǵanda jumys isteitin mundai, durys telefondardyń 30 myń teńge turatynyn bilgen.
Uzyn qulaqtan estýimizshe, Taraz qalasy bilim bólimi «jarymjan» telefondardy 15 myń teńgege satyp alǵan. Al sotkanyń jai-japsaryn jetik biletin mamandar balalarǵa syilyq retinde usynylǵan telefondardyń 5 myń teńge aspaitynyn aitypty. Taǵy bir aita ketetin másele, álgi Aqtóbedegi firma elimizdegi biraz ákimdikterdiń Prezidenttik shyrshasynda beriletin syi-siiapatty daiyndaǵanyn estip qaldyq. Bul – sóz ras bolsa, Aqtóbeniń qýaiaq kásipkerleri talai ákimdi balalar aldynda jerge qaratqany anyq.
Iá, Taraz qalasy ákimi Nurjan Kalenderov Jańa jylda tarazdyq balǵyndar aldynda mundai jaisyz jaǵdaiǵa qalam dep oilamaǵan shyǵar. Biraq Taraz qalasy bilim bólimi basshysy Gúlziia Zaýrbekovanyń qyzmetkerleri qandai zat satyp alǵandaryn nege teksermedi eken?.. Kókeige tunǵan sansyz saýaldarǵa aldaǵy ýaqytta Gúlziia Rasylhanqyzy jaýap beredi dep senemiz.
Nurlan JUMAHAN
