تاراز قالاسى اكىمى نۇرجان كالەندەروۆتىڭ نازارىنا!
جاڭا جىلدا ورىن الادى-مىس دەگەن تاڭعاجايىپقا كەز كەلگەن بالا سەنەتىنى انىق. بيىل سول سەنىمگە سەلكەۋ تۇسكەندەي... بۇگىندە جەرگىلىكتى جەرلەردە اكىمدەردىڭ قاتىسۋىمەن پرەزيدەنتتىك شىرشا ۇيىمداستىرىلىپ، وعان الەۋمەتتىك جاعدايى تومەن وتباسىلاردىڭ بالالارى مەن جەتىم بالالار قاتىسىپ، ەلباسىنىڭ اتىنان بەرىلەتىن سىيلىقتى قۇشاقتاپ، ۇيلەرىنە ارقا-جارقا بولىپ ورالاتىن جاقسى ادەت قالىپتاسقان ەدى.
تاياۋدا ءدال وسىنداي پرەزيدەنتتىك شىرشا تاراز قالاسىندا ۇيىمداستىرىلىپ، بالالار ءان سالىپ، بي بيلەپ، ونەرلەرىن كورسەتىپ، سىيلىقتارىن العانىن جەرگىلىكتى اقپارات قۇرالدارى جارىسا جازدى. وسى شارا بارىسىندا تاراز قالاسىنىڭ اكىمى نۇرجان كالەندەروۆ مىرزا مەرەكەلىك شاراعا قاتىسقان بالعىندارعا ءبىر-بىر ۇيالى تەلەفوننان بەرىپ ءماز قىلعان-دى. وكىنىشكە وراي، بالالاردىڭ قۋانىشى كوپكە بارمادى. مۇنى بىزگە قالا اكىمىنىڭ قولىنان بالاسى سىيلىق العان اتا-انا اڭگىمەلەپ بەردى. ءاتى-جونىن اتاماۋدى وتىنگەن اتا-انا بىلاي دەدى:
– جاڭا جىل قارساڭىندا بالام قالا اكىمىنىڭ قولىنان ۇيالى تەلەفون الىپ ۇيگە قۋانىپ كەلدى. ۇلىم فۋتبولعا قاتىسۋشى ەدى. ول: «ماما، ەندى باسقا قالالارعا جارىسقا بارعاندا سۋرەتكە ءتۇسىرىپ، ساعان اكەلىپ كورسەتەمىن» دەپ سۋداي جاڭا ۇيالى تەلەفونىنىڭ قورابىن اشا باستادى. ادەمى قارا-كۇلگىن تەلەفون كوزدىڭ جاۋىن الادى. توققا قۋاتتاندىرعاننان كەيىن قوسقان سوڭ، قۋانىشىمىز سۋ سەپكەندەي باسىلدى. تەلەفون تەك قوڭىراۋ شالۋعا عانا جارايدى ەكەن. ىشىندەگى مازىرلەرىنىڭ ەشقايسىسى ىستەمەيدى. وسىلايشا جاڭا جىل قارساڭىندا اكىمنەن الدانعان بالام نە جىلارىن، نە كۇلەرىن بىلمەي دال بولدى، – دەيدى .
بالاسى جىلارمان كۇيگە تۇسكەننەن كەيىن ول قالالىق اكىمدىككە بارىپ ءمان-جايدى باياندايدى. ونداعىلار ادەتتەگىدەي مۇنداي جايسىز جاعداي بويىنشا وزدەرىنە ەشكىم شاعىم ايتىپ كەلمەگەنىن، جاڭا جىلدا بالالارعا سىيلىق الۋدى تاراز قالالىق ءبىلىم بولىمىنە تاپسىرعاندارىن ايتىپ، شىعارىپ سالىپتى.
بۇدان كەيىن اتا-انا ءبىلىم بولىمىنە بارعاندا باسشى ءىس-ساپاردا بولعاندىقتان كەزدەسە الماعان. ال ورىنباسارى بۇل جاعدايعا «تاڭدانىسىن» ءبىلدىرىپ، مۇنداي شاعىممەن ەشقانداي اتا-انا كەلمەگەنىن ايتادى. اتا-انا ءوزىنىڭ نەگىزسىز شاعىمدانىپ تۇرماعانىن ەسكەرتكەننەن كەيىن ۋاليحان بولاربەك ۇلى ءتيىستى ادامدى شاقىرىپ، ءمان-جايدى انىقتاۋدى تاپسىرادى. ورىنباساردان بۇيرىق العان ادام سوتكانى ساتىپ الۋ ىسىمەن بۋحگالتەريا اينالىسقانىن تىلگە تيەك ەتىپ، ەسەپشىلەرگە ءجون سىلتەگەن.
اتا-انا ءبىلىم ءبولىمىنىڭ بۋحگالتەرياسىنا بارعاندا ءۇيىلىپ جاتقان «جارىمجان» سوتكالاردى كورەدى. ول وزگە اتا-انالارمەن سويلەسكەندە سوتكالاردىڭ كەيبىرەۋىنىڭ ەكراندارى مۇلدە قوسىلمايتىنىن ەستىگەن.
ايتپاقشا، ەڭ قىزىعى تارازداعى بالالارعا سىيلىعىن تاراز قالالىق ءبىلىم ءبولىمى اقتوبەدەگى ءبىر كاسىپكەرلەردەن ساتىپ السا كەرەك. رەداكسيامىزعا حابارلاسقان اتا-انا ساۋدا ورىندارىنا بارعاندا جۇمىس ىستەيتىن مۇنداي، دۇرىس تەلەفونداردىڭ 30 مىڭ تەڭگە تۇراتىنىن بىلگەن.
ۇزىن قۇلاقتان ەستۋىمىزشە، تاراز قالاسى ءبىلىم ءبولىمى «جارىمجان» تەلەفونداردى 15 مىڭ تەڭگەگە ساتىپ العان. ال سوتكانىڭ جاي-جاپسارىن جەتىك بىلەتىن ماماندار بالالارعا سىيلىق رەتىندە ۇسىنىلعان تەلەفونداردىڭ 5 مىڭ تەڭگە اسپايتىنىن ايتىپتى. تاعى ءبىر ايتا كەتەتىن ماسەلە، الگى اقتوبەدەگى فيرما ەلىمىزدەگى ءبىراز اكىمدىكتەردىڭ پرەزيدەنتتىك شىرشاسىندا بەرىلەتىن سىي-سياپاتتى دايىنداعانىن ەستىپ قالدىق. بۇل – ءسوز راس بولسا، اقتوبەنىڭ قۋاياق كاسىپكەرلەرى تالاي اكىمدى بالالار الدىندا جەرگە قاراتقانى انىق.
ءيا، تاراز قالاسى اكىمى نۇرجان كالەندەروۆ جاڭا جىلدا تارازدىق بالعىندار الدىندا مۇنداي جايسىز جاعدايعا قالام دەپ ويلاماعان شىعار. ءبىراق تاراز قالاسى ءبىلىم ءبولىمى باسشىسى گۇلزيا زاۋربەكوۆانىڭ قىزمەتكەرلەرى قانداي زات ساتىپ العاندارىن نەگە تەكسەرمەدى ەكەن؟.. كوكەيگە تۇنعان سانسىز ساۋالدارعا الداعى ۋاقىتتا گۇلزيا راسىلحان قىزى جاۋاپ بەرەدى دەپ سەنەمىز.
نۇرلان جۇماحان
