Almatyda ál-Farabi dańǵylyndaǵy jol apaty boiynsha sot protsesi aiaqtalýǵa jaqyn, dep habarlaidy dalanews.kz.
Búgin sotta aiyptalýshy sońǵy sózin aitty. Ol keibir aqparat shyndyqqa janaspaitynyn málimdedi.
"Kóptegen BAQ-ta meniń jaǵdaiym, ata-anam jáne otbasym týraly jalǵan aqparat tarap jatyr. Soǵan bailanysty úndeý jasaǵym keledi. Tarazdan shyqqan qarapaiym jigitpin. 20 jasymnan bastap eńbek etip, barlyǵyna óz kúshimmen jettim. Millionerdiń, milliarderdiń balasy emespin. Saiasi tulǵalarmen nemese basqa da yqpaldy adamdarmen eshqandai bailanysym joq. Ne tapsam da, adal eńbegimniń arqasynda taptym", - dedi Aleksandr Pak.
Eske salaiyq, buǵan deiin jaryssóz barysynda prokýror sottan aiyptalýshyǵa Qylmystyq kodekstiń 345-1-baby 4-bóligi boiynsha 10 jyl bas bostandyǵynan aiyrý jazasyn taǵaiyndaýdy suraǵan edi.
Aita keteiik, jantúrshigerlik jol apatynan úsh adam qaza tapty.
