Tarazda qurylys salasyndaǵy sybailas jemqorlyq isi boiynsha sot úkimi shyqty. Qala ákiminiń burynǵy orynbasary Nurbol Qaldybaev qyzmettik ókilettigin asyra paidalandy dep tanylyp, tórt jylǵa bas bostandyǵynan aiyryldy, dep habarlaidy Dalanews.kz Orda.kz-ke silteme jasap.
Burynǵy sheneýnikpen birge sottalýshylar qatarynda merdiger uiymnyń ókili de boldy. Ol alaiaqtyq baby boiynsha kináli dep tanylyp, alty jyl túrme jazasyn aldy.
Tergeý nusqasyna sáikes, 2022 jylǵy shildeden 2023 jylǵy qarashaǵa deiin Qaldybaev Taraz qalasy ákimdiginde qurylys jáne turǵyn úi-kommýnaldyq sharýashylyq salasyna jetekshilik ete otyryp, birqatar óreskel zańbuzýshylyqtarǵa jol bergen. Atap aitqanda, «Uly Dala» jańa turǵyn alabyndaǵy eki kópqabatty úi qurylysy aiaqtalmaǵan kúide paidalanýǵa berilgen. Bul nysandarǵa biýdjetten 1,2 milliard teńgeden astam qarajat bólingen.
Bastapqyda Qaldybaevqa Qylmystyq kodekstiń 189-baby 4-bóligi boiynsha (senip tapsyrylǵan múlikti iemdený jáne ysyrap etý) aiyp taǵylǵan, alaida tergeý barysynda bul bap qyzmettik ókilettikti asyra paidalaný babyna aýystyryldy. Keltirilgen shyǵyn 137 million teńgeni qurady.
Sybailas jemqorlyqqa qarsy qyzmet Qaldybaevty otstavkaǵa ketken soń úsh apta ótkennen keiin, 2023 jylǵy 11 jeltoqsanda ustady. Sotta ol óz kinásin moiyndaǵan joq. Alaida merdiger Qaldybaevtyń nysandardyń naqty jaǵdaiynan habardar bolǵanyn jáne jalǵan qabyldaý aktilerine sanaly túrde qol qoiǵanyn rastady.
