Tarazdaǵy gimnaziialardyń birinde 15 jastaǵy oqýshy qatarlastarynyń soqqysyna jyǵylyp, aýyr jaraqat aldy. Týystarynyń aitýynsha, jasóspirimdi sabaq arasyndaǵy úziliste kiim aýystyratyn bólmege aldap kirgizip, sol jerde birneshe oqýshy jabylyp urǵan, dep habarlaidy Dalanews.kz.
"Kriminalnyi Kazahstan" telegram arnasy beinebaqylaý jazbasyn bólisti. Onda áýelde bastalǵan áńgime kóp uzamai tóbeleske ulasqan. Jábirlenýshini bas tusynan uryp-soqqan, al oǵan arasha túspek bolǵan dosyna kedergi keltirgen.
Jasóspirimniń anasynyń sózinshe, balasy aýyr jaraqat alǵan. Dárigerler onyń kózin saqtap qalý úshin shuǵyl ota jasap, zaqymdanǵan músheni qalpyna keltirýge tyrysqan. Qazirgi tańda oqýshynyń jaǵdaiy aýyr.
Anasynyń aitýynsha, dárigerler aldaǵy 10 kún asa mańyzdy ekenin eskertken. Sebebi infektsiianyń miǵa taraý qaýpi bar. Sonymen qatar bala miy shaiqalyp, kontýziia alǵan.
Jábirlenýshi otadan keiin bolǵan jaitty tolyq esine túsire almai otyr. Onyń aitýynsha, shabýyl jasaǵandardyń qolynda metall zat bolýy múmkin.
Atalǵan fakti boiynsha politsiia "densaýlyqqa qasaqana aýyr ziian keltirý" baby boiynsha qylmystyq is qozǵady. Kúdikti ustalyp, ýaqytsha ustaý izoliatoryna qamaldy.
Sondai-aq quqyq qorǵaý organdary oqiǵaǵa qatysy bar jasóspirimderdiń ata-analaryn da jaýapkershilikke tartý máselesin qarastyryp jatyr.
