Túrkiiada Qazaqstan azamaty Arif Ismailovtyń ólimine qatysy bar degen kúdiktiler ustaldy. Tergeý dereginshe, kásipkerdi atýǵa AQSh túrmesinde jazasyn ótep jatqan qylmys áleminiń ókili tapsyrys bergen bolýy múmkin, dep habarlaidy dalanews.kz.
KTK telearnasynyń habarlaýynsha, kúdiktiler Qazaqstan, Túrkiia jáne Grýziianyń quqyq qorǵaý organdary birlesip júrgizgen arnaiy operatsiia barysynda qolǵa túsken.
Tergeý málimeti boiynsha, ustalǵandar tapsyryspen adam óltirý, kásipkerlerge qysym kórsetý jáne bopsalaýmen ainalysqan uiymdasqan qylmystyq toptyń músheleri bolýy múmkin. Buǵan deiin halyqaralyq izdeýde júrgen azamattardyń basqa da qylmystarǵa qatysy tekserilip jatyr.
Arnaiy operatsiia kezinde kúdiktilerden tapansha tárkilengen.
Eske salaiyq, 35 jastaǵy almatylyq kásipker Arif Ismailov 2026 jyldyń naýryz aiynda Ystambulda qarýly shabýylǵa ushyraǵan. Belgisiz adam onyń basynan oq atqan. Aýyr jaralanǵan Qazaqstan azamaty aýrýhanaǵa jetkizilgenimen, keiin kóz jumdy.
IIM uiymdasqan qylmysqa qarsy kúres departamentiniń ókili Qýandyq Alpystyń aitýynsha, qylmystyq qurylymnyń birqatar múshesi Almatyda da ustalǵan.
"Olarǵa qarý qoldaný arqyly jasalǵan birneshe shabýylǵa qatysy bar degen aiyp taǵylyp otyr. Qazirgi ýaqytta anyqtalǵan qylmystyq faktiler boiynsha dálelder jinaý jalǵasýda. Qylmysqa qatysy bolýy múmkin basqa da kúdiktiler anyqtalyp jatyr", – dedi ol.
Quqyq qorǵaý organdary toptyń uiymdastyrýshysy retinde qarastyrylyp otyrǵan adamdy qylmystyq jaýapkershilikke tartý baǵytynda jumys júrgizip jatyr.
Tergeý jalǵasýda. Kúdiktilerdiń kinási sottyń zańdy kúshine engen úkimimen ǵana anyqtalady.
