Qazaq ádebietiniń klassigi, Qazaqstannyń Eńbek Eri, Memlekettik syilyqtyń laýreaty Ákim Úrtaiuly Tarazi qaitys boldy, dep habarlaidy Dalanews.kz.
Qaraly habardy Kúlásh Baiseiitova atyndaǵy Qazaq ulttyq óner ýniversitetiniń ujymy málimdedi.
- Qazaq ádebieti men óneri orny tolmas aýyr qaiǵyǵa ushyrady. Búgin kórnekti jazýshy, dramatýrg, kinostsenarist, Qazaqstannyń Eńbek Eri, Qazaqstan Respýblikasy Memlekettik syilyǵynyń jáne Frants Kafka medaliniń iegeri, professor Ákim Úrtaiuly Tarazidiń dúnieden ótkenin kúizele otyryp habarlaimyz.
Ákim Tarazi – qazaq ádebieti, kinosy men dramatýrgiiasynyń damýyna ólsheýsiz úles qosqan tulǵa. Onyń qalamynan týǵan týyndylar qazaq ádebietiniń altyn qorynan oryn aldy. Tarihi, filosofiialyq, áleýmettik taqyryptardy tereń qozǵaǵan shyǵarmalary birneshe býyn oqyrmannyń rýhani jan azyǵyna ainaldy.
Qazaq ádebieti, mádenieti men óneri jolyndaǵy eńbegi máńgi este saqtalady. K. Baiseiitova atyndaǵy Qazaq ulttyq óner ýniversiteti ujymynyń atynan, otbasy men týǵan-týystarynyń, shákirtteri men oqyrmandarynyń qaiǵysyna ortaqtasyp, kóńil aitamyz, – delingen aqparat kóziniń jazbasynda.
Memleket basshysy Qasym-Jomart Toqaev asa kórnekti jazýshy, dramatýrg, Qazaqstannyń Eńbek Eri Ákim Tarazidiń qaitys bolýyna bailanysty onyń jubaiy, Memlekettik syilyqtyń iegeri Roza Muqanova men balalaryna kóńil aitty.
– Ákim Tarazi búkil sanaly ǵumyryn sóz ónerine arnaǵan, tól ádebietimiz ben mádenietimizdi tórge ozdyrǵan ultymyzdyń birtýar perzenti edi. Daryndy qalamger qazaq prozasynyń kókjiegin keńeitti, ulttyq kino jáne dramatýrgiia salasyna ólsheýsiz úles qosty. Asyl muratynan eshqashan ainymaǵan qalam iesin kózi qaraqty oqyrman «Ádebiet áleminiń Ákimi» dep ardaq tutty, ziialy qaýym onyń shyǵarmashylyǵymen qatar adamgershilik qasietterin erekshe baǵalady. Ónegeli ómir súrip, sońyna mol mura qaldyrǵan Ákim Tarazidiń jarqyn beinesi halqymyzdyń júreginde máńgi saqtalady, – delingen jedelhatta.
