Tanymal ekonomıs, táýelsiz sarapshy Maqsat Halyq ınflásıamen kúres baǵany toqtatý emes, júıeni durys qurý ekenin aıtty, dep habarlaıdy Dalanews.kz.

Sarapshynyń pikirinshe, paıyzdyq mólsherlemeni arttyrý ınflásıa qarqynyn ýaqytsha baıaýlatýy múmkin. Biraq ekonomıkada óndiris álsiz, logıstıka qymbat, al naryqta monopolıalardyń yqpaly basym bolsa, baǵanyń ósýi báribir jalǵasady.

Maman ınflásıamen tıimdi kúres qurylymdyq ózgeristerden bastalýǵa tıis ekenin aıtty. Sonyń ishinde ishki óndiristi damytý, naryqtaǵy básekeni kúsheıtý, tarıf saıasaty pen búdjet tártibin jolǵa qoıý, sondaı-aq, halyqtyń naqty tabysyn qorǵaý basty basymdyqqa aınalýy qajet.

Ekonomıs ınflásıany tek aqsha-nesıe saıasatynyń máselesi retinde qarastyrý qate ekenin atap ótti. Onyń pikirinshe, ınflásıa - eń aldymen memlekettik basqarý sapasynyń kórsetkishi.