Tanymal akter, teatr maitalmany Rahman Omar osydan 20 jyl burynǵy qyzyqty oqiǵasyn esine aldy. Ol Nazarbaev áýletiniń otbasylyq keshinde júrgizýshi bolǵan sátin Dýlat Tastekeimen suhbatynda áńgimelep berdi, dep habarlaidy Dalanews.kz.
“2004 jyly Nazarbaevtyń úiindegi Jańa jyldyq keshti júrgizdim. Bul — tek otbasy músheleri men jaqyndary ǵana jinalǵan kesh edi. Balalary, nemereleri, qudalary shaqyryldy. Qulybaevtar men Álievter áýletiniń úlkenderi de boldy. Timýr Qulybaevty alǵash ret sol kezde kórdim. Óte jinaqy, barlyǵyna muqiiat qaraityn, baisaldy adam eken. Al Áliev múlde basqa minezdi bolyp shyqty. Elbasy sóilep jatqanda, ár sózine kúlip, tipti aiaǵyn ústelge qoiyp otyrdy. Sol sátte Nazarbaevtyń túri buzylyp ketti. Ol kezde Áliev UQQ-ny basqaryp turǵan edi. “Kedei bai bolsam deidi, bai qudai bolsam deidi” degen osy. Depýtattardyń ózi odan qorqyp júretin”, – dep eske aldy akter.
Sonymen qatar, teatr juldyzy toi júrgizip, eń kóp qalamaqy alǵan kezi týraly da aityp ótti.
“Asaba bolýyma ulym sebepker boldy. Bir kúni úsh jastaǵy balam nanǵa mai jaǵyp bershi dep surady. Biraq ony satyp alatyn aqsha joq edi. Sol kezde toi júrgizýge bel býdym. Úide daiyndalyp, Tólegen men Muqaǵalidyń óleńderin jattaitynmyn. Alǵashynda toibastar taratatyn kómekshi, keiin asaba boldym. Nazarbaevtar áýletiniń jabyq keshterin birneshe ret júrgizdim. Eń kóp tólengen gonorarǵa eki bólmeli páter aldym”, – dedi kinojuldyz.
