«AMANAT» partıasy ashyq, kásibı jáne teń jaǵdaıda – jarıa dıalogtyń jańa standartyn qalyptastyrady. Otyrystyń negizgi ýaqyty saıası júıeni transformasıalaý jáne aralas saılaý júıesine kóshý týraly pikirtalastarǵa arnaldy. Bul rette, spıkerlerge suraqtardy zaldaǵy sarapshylar men qatysýshylar ǵana emes, sonymen qatar onlaın-kórermenderdiń de qoıýyna múmkindigi boldy. Jalpy, 700-den astam pikir men suraqtar kelip tústi.
«TALQYLAU»-dyń alǵashqy otyrysyn ashqan «AMANAT» partıasynyń Atqarýshy hatshysy Ashat Oralov Prezıdent jarıalaǵan reformalar Qazaqstannyń memlekettik qurylysy tarıhynyń jańa kezeńine bastaıtynyn atap ótti.
– Saılaý týraly zańnamaǵa ózgerister engiziledi. Bul eldegi demokratıalyq ózgeristerdiń katalızatory men negizine aınalatyny sózsiz. Saıası partıalardy tirkeý resimderin jeńildetý jańa saıası qozǵalystardyń qurylýyna serpin beredi jáne jumys istep turǵan saıası birlestikterdiń óz qyzmetin jandandyrýyna alyp keledi.
Bul baǵytta «AMANAT» partıasy belsendi jumys isteýde. Sıezen beri bir aıǵa da jetpeıtin ýaqyt ótti. Soǵan qaramastan onyń barysynda aıtylǵan mindetter men bastamalar búginde iske asyrylyp jatyr jáne «TALQYLAU» – sol bastamalardyń biri, – dep atap ótti partıanyń Atqarýshy hatshysy.
Óz kezeginde, «AMANAT» partıasy depýtattyq fraksıasynyń múshesi Saıasat Nurbek talqylaý alǵash ret tikeleı efırde ótip jatqanyn alǵa tartyp, «Biz búgin qurylymdanbaǵan, senzýradan ótpegen ashyq dıalog dástúrin bastaımyz dep úmittenemiz. Bul Prezıdent joldaýy aıasynda óte mańyzdy, óıtkeni «Jańa Qazaqstan» jumysyn jańa qaǵıdattar men jańa jumys formattarynan bastaý kerek» dedi.
«Qazaqstannyń Azamattyq Alánsy» ZTB prezıdenti Baný Nurǵazıeva myqty qoǵamsyz myqty memleket qurý múmkin emes degen pikir bildirdi.
– Biz jańa reformalarǵa daıynbyz. Jurtshylyq kóp nárse ózgeredi degen úmitpen Joldaýdy yqylaspen qabyldady. Azamattyq qoǵam ókilderimen birlesip zańnamalyq ózgeristerge qatysty kóptegen jumys atqarylady dep kútemiz, – dedi ol.
Parlament Májilisiniń depýtaty Berik Ábdiǵalıulynyń aıtýynsha, qazir elimizdi jańa deńgeıge kóterýge úlken múmkinshilik bar. Ol úshin Jańa Qazaqstanda ózgeristi árkim ózinen bastaýy kerek.
– 30 jylda jetken jetistikterimiz bar. Biraq kemshilikterimiz de az emes. Jańa Qazaqstanda partıadan bastap, árbir azamatqa deıin, aýyl ákiminen Prezıdenttiń jumysyna deıingi jiberilgen kemshilikterdi anyqtap, tipti, sonyń tizimin de jasasaq. Búdjetti qurýda bizde kóptegen gıgantomanıa boldy. Qanshama mıllıardtaǵan qarajat basqa jaqqa jumsalyp, al myna jaqta halyq úısiz-kúısiz júrdi. Onyń barlyǵy kemshilik pe? Árıne, kemshilik. Sondyqtan Prezıdenttiń aıtqany, birinshi kezekte basymdyq ózgerýi kerek. Ol úshin halyqtyń jaǵdaıyna qaraý qajet. Barlyǵynyń ólshem – adam. Mine, qazirgi bizdegi naǵyz qaǵıda osy. Birtindep soǵan kele jatyrymyz, – dedi depýtat.
– Halyq únine qulaq asatyn memleket» týraly aıtqanda, biz árqashan «qulaq asatyn memleket» jaǵdaıynda «aıtatyn» qoǵam qajet ekenin túsinýimiz kerek. Eger ashyq «aıtatyn» qoǵam bolmasa, onda olar kimniń únine qulaq asýy kerek? Endi biz prosesti jyldamdatý kerek. Óıtkeni Joldaýda ıdeıalar ǵana aıtyldy, al olardy qalaı júzege asyratynymyzdy biz birge oılanýymyz kerek. «AMANAT» partıasy óziniń alǵashqy ózgeristerin ashyq alańnan bastaǵany jáne bizdi shaqyrǵany quptarlyq, – dedi qoǵam qaıratkeri, «Serpin» Ulttyq bilim jáne ınovasıalar palatasynyń prezıdenti Murat Ábenov.
Sondaı-aq, QR Prezıdenti janyndaǵy QSZI dırektory Erkin Tuqymov, Eýropalyq quqyq jáne adam quqyqtary ınstıtýtynyń dırektory Marat Báshimov, Qazaqstandyq qoǵamdyq damý ınstıtýtynyń basqarma tóraǵasy Qazbek Maıgeldınov, QR BǴM Ǵylym komıtetiniń Memleket tarıhy ınstıtýty dırektorynyń orynbasary Búrkitbaı Aıaǵan, Parlament Májilisiniń depýtaty Tilektes Adambekov jáne basqalar óz pikirlerimen bólisti.
Kelesi «TALQYLAU» otyrysy podkast jazbasy, debattar, pikirtalastar sıaqty túrli formatta ótedi. Ári qaraı taqyryptar Qoǵamdyq saıasat ınstıtýtynyń Telegram-arnasynda daýys berý qorytyndysy boıynsha anyqtalatyn bolady.
Esterińizge sala keteıik, «TALQYLAU» pikirtalas alańyn qurý bastamasy 1 naýryzda ótken kezekten tys Sıeze partıany transformasıalaý baǵdarlamasynyń bir tarmaǵy retinde jarıalanǵan edi. Alańda azamattardy tolǵandyratyn ózekti máselelerdi sheshetin usynystar ázirleý úshin sarapshylar, depýtattar, memlekettik organdar men ÚEU ókilderi turaqty túrde kezdesedi. Sonymen qatar, pikirtalas «Aıqyn» jáne «Lıter» gazetteriniń arnaıy aıdarlarynda jarıalanatyn bolady.
