Teatr jáne kinorejisseri, kinodramatýrg Talǵat Temenov qazaq kinosynyń qazirgi jaiyn synǵa alyp, tender jemqorlyqtyń kózine ainalǵanyn aitty, - dep habarlaidy Dalanews.kz.
Onyń sózinshe, keiingi jyldary jemqorlyqpen kúresemiz dep qajetsiz zańdar qabyldanǵan.
"Bul qoǵamnyń 30 jyldaǵy rýhaniiatymyzǵa tigizgen ziianynyń biri - kóp zań qabyldadyq. Kino túsirý jyldan-jylǵa ońai. Halyqqa kerek kinony túsirýdiń ornyna bireý ortalyq qurdy. Kezindegi ministrimiz Arystanbek kezinde osy ortalyq quryldy.
Odan keiin birneshe adam aýysty. Olar jemqorlyqpen ainalysty. Sol jemqorlyqty qurtamyz dep neshe túrli zań qabyldandy", - deidi Temenov "Qasqa jolǵa" bergen suhbatynda.
Sondai-aq, rejisser tender salasyndaǵy bylyqtardyń betin ashty.
"Tender deidi, pitching deidi. Bir rette qazaqtyń rýhaniiat degen aýylynda eki it jatyr, bireýi - tender, bireýi gender dep aityp edim. Gender degen - qoldan batyr jasaý. Ekinshisi - tender.
Sondai daiyndalǵan dúnieden keiin jemqorlyq talantty túrge ainaldy. Jemqorlyq tender shyqqaly beri naǵyz hameleon boldy. Muny ustap qalý múmkin emes. Óitkeni tenderdi utatyndar, tenderdi jariialaǵan kimder? Jemqorlyqtan qoryqqan adamdar bolmasa jemqorlyqty biletin adamdar osyny oilap tapty.
Dúnieniń sulýlyǵynan ne paida, esigińde tender it pen gender it kútip tursa?! Zańdardyń bári qazaq kinosyna keri áser etkendikten qazaq kinosynyń qazir aiaǵy tusaýly", - dedi ol.
Sonymen qatar, rejisser "Qazaqfilmdi jabý kerek" deitinderdi dushpandar dep sanaitynyn jetkizdi.
"Bular qazaq rýhaniiatyna jany ashymas bezbúirek, qazaq atyn jamylǵan dushpandar dep bilemin. Qazaqfilm - qazaq óneriniń murajaiy, qazaq rýhaniiatynyń murajaiy, qazaq rýhaniiatynyń baý-baqshasy, báiteregi. Biz dúnieniń bárin talqandap bitip, endi Qazaqfilmdi talqandasaq, kelesi urpaq bizdi keshirmeidi. Ulttyq kitaphanamyz, ulttyq murajaiymyz, ulttyq kinomyz, ulttyq ádebietimiz, ulttyq mádenietimiz joǵalǵan kúni qazaq halqy da jer betinen joǵalady", - dedi ol.
Tanymal ónertanýshy din taqyrybyna qatysty da pikir bildirdi.
"Ultshyldardan qoryqpaýymyz kerek, dinshilderden qorqýymyz kerek. Keshegi Qańtarda baiqamadyń ba? Dinshilder júrdi ǵoi. Qańtardy uiymdastyrǵan adamdardyń negizgi tutqalaryn ustap turǵan tek dinshilder boldy. ...Qazaqqa keregi - dinshildikten góri bilim, ǵylym. Ǵylymdy, bilimdi igergen adam dinin ózi tańdap alady", - dep túiindedi áńgimesin ol.
