Burynǵy Astana LRT basshysy Talǵat Ardan ustalǵanyna bir ai ótse de, áli Túrkiiada. Bas prokýrordyń orynbasary Aset Shyndaliev onyń ekstraditsiiasyna qatysty suraqqa jaýap berdi, dep habarlaidy Dalanews.kz.
Májilis kýlýarynda Shyndalievke Astana LRT-nyń burynǵy basshysy Talǵat Ardan nege uzaq ýaqyt boiy ustatpai júrgeni týraly suraq qoiyldy. Onyń aitýynsha, Ardannyń ustalý jyldamdyǵy ony izdestirgen jedel qyzmetterdiń jumysyna bailanysty.
“Bizdiń qazaqstandyq qyzmetter shetelge shyǵyp, óz betinshe izdeý júrgize almaidy. Sheteldik arnaiy qyzmetter Interpoldyń kómegimen jumys isteidi. Sondyqtan ony (Ardandy – red.) Túrkiia politsiiasy ustady”, – dedi Bas prokýrordyń orynbasary.
Ol sheteldik arnaiy qyzmettermen árekettesý mehanizmin de túsindirdi.
“Biz adamdy halyqaralyq izdeýge jariialaimyz, ol aqparat Interpol bazasyna engiziledi, sodan keiin álem boiynsha izdeý bastalady. Tulǵa tabylǵan jaǵdaida, ony ustaý sharalary qabyldanady. Ózderińiz biletindei, Talǵat Ardan Túrkiiada ustaldy. Qazir ol Túrkiiada qamaýda otyr. Astanaǵa áli kelgen joq. Biz barlyq qajetti qujattardy túrik jaǵyna joldadyq. Qazir olar materialdardy qarap jatyr jáne sheshim qabyldaidy. Onyń Qazaqstanǵa naqty qashan ekstraditsiialanatyny ázirge belgisiz. Sebebi ekstraditsiia máselesi Túrkiianyń zańnamasyna sáikes retteledi, biz túrik tarapynan protsesti tezdetýdi talap ete almaimyz. Bul – olardyń ishki protsesi jáne ol óz zańdaryna sáikes júredi”, – dep tolyqtyrdy Shyndaliev.
