Talǵarda kisi qolynan qaza tapqan 16 jastaǵy Sherzattyń ata-anasy Talǵar aýdany ákimdiginiń aldyndaǵy joldy jaýyp tastady, dep habarlaidy Dalanews.kz.
Olar qylmysqa qatysqandardyń barlyǵyn ustap, jazalaýdy talap etip otyr.
Álemjelide taraǵan aqparatqa súiensek, marqum jigittiń ákesi men anasy, basqa da jaqyndary ákimdik aldyndaǵy joldy jaýyp tastaǵan.
“Talǵarda shý shyǵyp jatyr. 16 jastaǵy jigitti baqilyq qylǵan kúdiktilerdi ustaǵan. Alaida bári bosatylyp, bireýi ǵana qylmysty óz moinyna alyp otyr. Al marqumnyń ata-anasy barlyǵy birdei zań aldynda jaýap bersin dep dabyl qaǵýda. Qudai saqtasyn, aman bolaiyq!”, - deidi áleýmettik jeli qoldanýshysy.
Eske salaiyq, qaiǵyly oqiǵa 4 qazanǵa qaraǵan túni bolǵan edi. Sýyq qarý asynǵan bir top jigit marqum jasóspirimge, onyń aǵasy men ákesine shabýyl jasaǵan.
Sherzattyń ákesi jalǵa dúken alyp, saýda jasaýmen ainalysatyn. Arty ólimmen aiaqtalǵan tóbeles osy dúkennen bastalǵan.
Bir jigit dúkenge kelip, bir quty syra alyp, aqshasyn tólemei kete barǵan. Sherzattyń ákesi syranyń aqshasyn tóleýdi talap etken kezde janjal týyndaǵan.
Sherzat osy sátte klienttiń dúkennen shyǵyp ketýin suraǵan. Biraq syra alǵan jigit dostaryna qońyraý soǵyp, dúkenge úsh kólikpen bir top jigit kelgen.
Bir top jigit Sherzatty tepkilei bastaǵan. Bul sátti turǵyndar videoǵa túsirip alǵan. 10-shy synypta oqityn Sherzat ata-anasynyń dúkenine kezdeisoq kelgen. Sýyq qarýmen kelgen buzaqylar eshkimdi aiamapty. Qansyraǵan bir otbasynyń músheleri aýrýhanaǵa jetkizilgen. Kóp uzamai Sherzat jansaqtaý bóliminde kóz jumǵan.
Osy tusta marqumnyń ápkesi Baqyt Reimova politseiler tóbeleske qatysýshylardyń bárin áli qamaýǵa almaǵanyn aitady. Ol quzyrly organdardan kúdiktilerdiń bárin ustap, kórsetýin talap etip otyr.
"Eger rezonans jasamasaq, bizdi eshkim estimeidi. Inim áskeri qyzmetker bolǵysy keldi. Qanshama armandary ishinde ózimen birge ketti. Sondai ókinishti jaǵdai. Bulai bolmaýy kerek edi", - deidi Baqyt Reimova.
Onyń aitýynsha, Sherzatty kúdiktiler aiýandyqpen óltirgen. Qansyrap jatqanynda kúdiktilerdiń bireýi artynan kelip, avtomatpen urǵan eken.
"Máiitti óz kózimmen kórdim. Balanyń basy qaq aiyrylyp ketken. 30-ǵa kelgen erkekter 16-daǵy jasóspirimge jabylǵan. Ákesin sabap, baýyrymdy úsh jerden pyshaqtap ketken. Bir syra bermegeni úshin óldi. Masqara ǵoi. Ákesine qorǵan bolǵany úshin óltirip ketti. Endi olardy nege shyǵaryp jiberedi? Ádildik qaida? Qai memlekette ómir súrip jatyrmyz? Osylai bizdiń balalarymyz ólip kete bere me? Bul ne degen sumdyq?", - deidi marqumnyń ápkesi.
Sherzattyń týystary keminde 13 kúdikti baryn aitady. Alaida politsiia 7 adamdy ǵana ustapty. Oqiǵa ornynda bolǵan Sherzattyń ákesi de málimdeme jasady. Ol ádil sot talap etti.
