Talǵar qalasynda «Hýtor» UQT quramymen bailanysy bar dep aiyptalǵan Hasan Qasymbaev pen taǵy bes adamnyń soty jalǵasyp jatyr. Aiyptalýshylar qatarynda Rýslan Aliev, Madiiar Kalymjanov, Sailaý Aqtanov, Nurmuhambet Sultanbekov jáne Daniiar Asqarov bar. Olar adam urlady, qasaqana aýyr dene jaraqatyn saldy jáne qorqytyp aqsha talap etti degen aiyppen sot aldynda jaýap berýde, dep habarlaidy Dalanews.kz.
Kezekti otyrysta jábirlenýshi Arman Alimov 2016 jyldan beri Qasymbaevty tanitynyn aitty. Onyń sózinshe, aiyptalýshylardyń barlyǵy bir-birimen Sailaý Aqtanov arqyly tanysqan. Alimov olar Qasymbaevpen birge «unamaityn adamdarmen esep aiyrysqanyn» jetkizdi.
Alaida bul sózderge aiyptalýshylardyń advokaty qarsylyq bildirip, onyń is materialdaryna qatysy joq ekenin málimdedi. Osydan keiin jábirlenýshi 2020 jylǵy oqiǵaǵa qatysty málimet berdi.
Alimovtyń aitýynsha, ony maska kigen adamdar úiiniń mańyndaǵy dúken janynan ustap áketken.
«Aqtanov meni shaqyrdy. Osy sátte Kalymjanov qolymnan ustap aldy. Aqtanov denemnen qysyp ustady. Basqalary aiaǵymnan tartyp, aýdaryp, ura bastady. Esimnen tanyp, kóliktiń ishinde oiandym. Meni dalaǵa alyp shyǵyp, jaýap ala bastady», – dedi ol.
Jábirlenýshiniń sózinshe, olar odan 2020 jyly bolǵan atysqa qatysy bar-joǵyn suraǵan. Ol oqiǵada aiyptalýshy Kalymjanov jaraqat alǵan edi. Sondai-aq Alimov Alievtiń Qasymbaevqa qońyraý shalǵanyn, sodan keiin onyń tapsyrmasymen soqqyny telefonǵa túsirip alǵandaryn aitty. Birazdan soń Qasymbaevtyń ózi oqiǵa ornyna kelip, kólikten shyqpai: «Jetedi, kettik, kózge tústik» degenin eske aldy. Osydan keiin olar jábirlenýshini tastap ketken.
Alimov ózin beisbol taiaǵymen búirek pen aiaq tusynan urǵandaryn aitty. Onyń alǵan jaraqattaryna qatysty sot-meditsinalyq saraptama qorytyndysy keiin sotta mamandardyń qatysýymen qaralatyn bolady.
