Almaty oblysy Talǵar aýdanyndaǵy №8 arnaiy mekteptiń basshylyǵy seminar ótkizý úshin muǵalimderden 2 000 teńgeden jinaǵan, dep habarlaidy Dalanews.kz.
Beinejazbada basshylyqtyń qazaq ádebieti pániniń muǵalimderine erekshe shúilikkeni baiqalady.
"Qazaq ádebieti pániniń muǵalimderi nege bermeidi?", — deidi ákimshilik ókili.
Al muǵalimderdiń biri óziniń qarjylai jaǵdaiynyń qiyn ekenin aityp, aqsha bere almaitynyn túsindiredi.
"Kóligim de, úiim de nesiege alynǵan. Qazir artyq aqsham joq, nesiemdi jaýyp bolǵan soń beremin", – deidi ol.
Alaida mektep ákimshiligi oǵan jáne basqa muǵalimderge qysym kórsetip, "bas tartsańdar, saldary bolady" dep eskertken.
Sondai-aq videoda basshylyqtyń "nege bermeisińder?", "basqa ustazdar kómektesti ǵoi" degen renish bildirgeni estiledi. Keibir muǵalimder "bergim kelmei otyrǵan joq, tek jaǵdaiym joq" dep aqtalǵan.
Atalǵan oqiǵa áleýmettik jelide úlken rezonans týǵyzdy. Kópshiliktiń aitýynsha, bul jaǵdai Prezidenttiń muǵalimderdiń quqyqtaryn qorǵaý jónindegi tapsyrmasyna qarama-qaishy kelip otyr.
Eske sala keteiik, buǵan deiin Oqý-aǵartý ministrligi bilim berý uiymdarynda muǵalimder men ata-analardan aqsha jinaý zańsyz ekenin birneshe ret eskertken edi.
Ministrliktiń málimetinshe, jýyrda respýblika boiynsha 2 myńnan astam bilim berý uiymdarynyń basshylary men aýmaqtyq departament ókilderiniń qatysýymen korrýptsiialyq táýekelderdiń aldyn alý jáne eskertý maqsatynda arnaiy jiyn ótken.
"Qatysýshylarǵa sybailas jemqorlyqqa qarsy is-qimyl, baqylaý sharalaryn uiymdastyrý jáne qyzmettiń ózin-ózi baǵalaý tetikteri boiynsha túsindirý jumystary júrgizildi. Ásirese, bilim uiymdarynda ártúrli syltaýlarmen zańsyz aqsha jinaýdyń jolyn kesý jáne pedagogtardyń kásibi qyzmetine qatysty zań talaptarynyń buzylýyna jol bermeý máselelerine erekshe nazar aýdaryldy", – dep habarlady ministrlik.
Qazaqstanda pedagogtardy kásibi qyzmetine qatysy joq jumystarǵa tartý, sondai-aq olarǵa taýarlar men qyzmetterdi satyp alý mindetin júkteý zańmen tyiym salynǵan. Mundai normalardyń buzylýy zańnamaǵa sáikes jaýapkershilikke ákeledi.
"Bilim berý protsesiniń árbir qatysýshysy adaldyq pen ádildiktiń úlgisi bolýy tiis. Ár pedagog pen mektep basshysy sybailas jemqorlyqtyń aldyn alýǵa atsalysýy qajet. Biz osy qaǵidattardyń qatań saqtalýynyń mańyzdylyǵyna nazar aýdaramyz jáne pedagogtar men bilim berý uiymdarynyń basshylaryn kez kelgen quqyqbuzýshylyq týraly habarlaýǵa shaqyramyz", – dedi Bilim salasyndaǵy sapany qamtamasyz etý komitetiniń tóraǵasy Ernur Dáýenov.
