Jetisý oblysynyń ortalyǵy – Taldyqorǵanda qalanyń syrtqy kelbetin jáne kóshelerdiń estetikalyq kórinisin jaqsartý baǵytyndaǵy jobalar júzege asyrylýda. Atap aitqanda, biyl Jansúgirov kóshesi boiyndaǵy 24 kóp qabatty turǵyn úidiń qasbetin jáne 33 turǵyn úidiń shatyryn jóndeý josparlanǵan. Abattandyrý jumystarynyń barysymen jumys sapary aiasynda Jetisý oblysynyń ákimi Beibit Isabaev tanysty, dep habarlaidy dalanews.kz.
Sońǵy jyldary óńir basshysynyń tapsyrmasyna sáikes Taldyqorǵan qalasyndaǵy turǵyn úi qorynyń syrtqy kelbetin jaqsartýǵa baǵyttalǵan júieli jumystar júrgizilýde. Eń aldymen bul qalanyń eski shaǵyn aýdandaryn qamtydy. Atap ótsek, oblys qurylǵannan beri 80 kóp qabatty turǵyn úidiń shatyry jáne 30 turǵyn úidiń qasbeti jańartyldy. Sonymen qatar qalanyń ortalyq kósheleri, onyń ishinde Jansúgirov kóshesi de qaita jańǵyrtýdan ótti.
Jansúgirov kóshesindegi turǵyn úilerdi aralaý barysynda Beibit Isabaev júrgizilip jatqan jumystardyń sapasy men belgilengen merzimde aiaqtalýyna erekshe nazar aýdardy. Merdiger uiymnyń atqarýshy direktory Qairat Imanǵabylovtyń aitýynsha, kompaniia alty kóp qabatty turǵyn úidiń qasbetin jóndeýdi júzege asyrýda. Qazirgi tańda nysandarda josparlanǵan jumystardyń 40–60% oryndalǵan. Al turǵyn úilerdiń shatyrlaryn jańartýmen ainalysyp jatqan merdiger uiymnyń ókili Saqtasyn Nókerbekov osy kóshedegi tórt turǵyn úidiń shatyryn jóndeý jumystarynyń barysy týraly baiandady.
Sonymen qatar oblys ákimi qaita jańǵyrtylyp jatqan turǵyn úilerdiń birinshi qabatynda ornalasqan kásipkerlik nysandarynyń ieleri óz nysandaryn biryńǵai dizain-kod talaptaryna sáikes rásimdeýi qajet ekenin atap ótti. Osyǵan bailanysty Taldyqorǵan qalasy ákimdigi tarapynan kásipkerler arasynda tiisti túsindirý jumystary júrgizilýde.
Nysandardy aralaý barysynda Jansúgirov kóshesindegi №80/84 úidiń turǵyndary oblys ákimine jolyqty.
- Úiimizge 55 jyl ishinde alǵash ret osyndai aýqymdy jóndeý júrgizilip jatyr. Brigada óz jumysyn sapaly atqaryp jatqanyn kórip otyrmyz, qurylys materialdary da ýaqytyly jetkizilýde. Bizdiń máselemizge kóńil bólip, qoldaý kórsetkenderińiz úshin alǵysymyzdy bildiremiz, – dedi osy úidiń turǵyny Vladimir Borisov. Atap ótsek, bul turǵyn úige jóndeý júrgizý qjettiligi týraly másele buǵan deiin oblys ákiminiń halyqpen kezdesýinde kóterilgen bolatyn.
Sondai-aq Beibit Isabaev Jansúgirov kóshesindegi magistraldy jylý jelilerin qaita jańǵyrtý jumystarynyń barysyn da tekserdi. Óńir basshysy qubyr tartý jumystarynyń qarqynyn baǵalap, jol jabyndysyn qalpyna keltirý merzimine erekshe nazar aýdardy.
Joba aiasynda jalpy uzyndyǵy 3,5 shaqyrym bolatyn magistraldy jylý jelilerin aýystyrý kózdelgen. Qaita jańǵyrtý jumystary eki kezeńge bólingen. Birinshi kezeńde Gagarin kóshesinen Shevchenko kóshesine deiingi ýchaskede qubyrlardy tóseý jumystary tolyq aiaqtaldy. Al ekinshi kezeń Shevchenko kóshesinen №3 sorǵy stantsiiasyna deiingi aralyqty qamtidy. Qubyrlar tóseý jáne gidravlikalyq synaqtar aiaqtalǵannan keiin joldyń asfalt jabyny tolyq qalpyna keltiriledi. Jylytý maýsymy bastalǵanǵa deiin nysan tolyq paidalanýǵa berilýi tiis.
Oblys ákimi qazirgi tańda qalada jylýmen jabdyqtaý júiesin kezeń-kezeńimen tabiǵi gazǵa kóshirý jumystary júrgizilip jatqanyn atap ótti. Osy maqsatta bolashaqta negizgi júktemeni kóteretin gaz týrbinaly stantsiia salynyp jatyr. Sonymen qatar «Basqýat» kómir qazandyǵy rezervtik jylý kózi retinde saqtalady. Qabyldanyp jatqan bul sharalar óńirdegi ekologiialyq ahýaldy jaqsartýǵa da oń áserin tigizedi.
- Búgingi kúni atqarylyp jatqan jumystar aiaqtalǵannan keiin Jansúgirov kóshesi zaman talabyna sai jańa kelbetke ie bolady. Jylý jelilerin jańǵyrtýmen qatar kóp qabatty turǵyn úilerdiń qasbetteri men shatyrlaryn jóndep jatyrmyz. Odan keiin jol jabyny tolyq qalpyna keltiriledi. Osylaisha, júieli qarastyrýdyń arqasynda biyl Jansúgirov kóshesine qatysty barlyq jumystardy aiaqtaimyz. Al kelesi jyly bul jumystar qalanyń basqa da bólikterinde jalǵasady, – dedi Beibit Isabaev.
Bul rette Jetisý oblysy «Energetika jáne kommýnaldyq sektordy jańǵyrtý» ulttyq jobasyn iske asyrý, sonyń ishinde 2026–2027 jyldarǵa arnalǵan jobalar pýlyn qalyptastyrý boiynsha kóshbasshy óńirlerdiń qatarynda ekenin atap ótýge bolady. Jalpy alǵanda, aldaǵy eki jylda óńirde ulttyq jobany júzege asyrýǵa shamamen 79 mlrd teńge investitsiia tartý josparlanǵan. Osy qarajat esebinen eki jyl ishinde 1 156,2 shaqyrym injenerlik jeli jóndelip, jańǵyrtylady, sondai-aq 83,6 myń esepke alý quraly ornatylady. Sonyń nátijesinde óńirdegi injenerlik infraqurylymnyń ortasha tozý deńgeii 19 % tómendeidi dep kútilýde.
