Tálimbaq aýmaǵynan Tán-SHan shyrshasy, qaıyń, qaraǵaı, usaq japyraqty jóke, úshkir japyraqty úıeńki jáne basqa da túrli aǵashtardyń alqabyn kezdestirýge bolady. Atalmysh nysannyń agronomy Seıithan Baıbuqashevtyń aıtýynsha, ázirge munda 15 jumysshy eńbek etedi. Aldaǵy ýaqytta jumysshylar sanyn arttyrýǵa qajettilik týyndap otyr. Qazirgi kezde 5 tehnıka satyp alynǵan, qajetti tehnıka qataryn áli de tolyqtyrmaq nıette.
Oblys ákimi A. Batalov tálimbaqtyń bos jatqan jeri bolmaýy kerektigin, árbir sharshy metr tıimdi qoldanylýy qajettigin eskertti. Aldaǵy ýaqytta barlyq ósimdikter men aǵashtardy qutyda ósirse, ony tıisti jerge jóneltýde de qolaıly bolmaq.
– Osyǵan deıin Taldyqorǵan qalasyn kógaldandyrý isine qajetti kók óskinniń bári de syrttan satyp alynatyn. Endi qala óz aýmaǵyn ózi ósirgen jasyl jelekpen kómkerýge múmkindigi bar. Bul birinshiden, qarjy shyǵynyn azaıtsa, ekinshiden, óz tálimbaǵymyzdy damytýǵa biz barlyq jaǵdaıdy jasap otyrmyz. Endigi jerde óndiristik jylyjaı salýǵa jáne ıntensıvti tehnologıamen tamshylatyp sýarýdyń eń sapaly júıesin ornatyp, onyń tıimdi jumys isteýine qajetti qarjyny da qarastyratyn bolamyz, – dedi A. Batalov.
Osy kúni oblys basshysy qalada qurylysy júrip jatqan drama teatr, Saltanat saraıynda boldy. Qalaǵa kireberistegi 3-bólimsheniń kóshelerin retteý jumystarymen tanysty. Qala ákimdigi qurylys normalarynyń saqtalýyn qadaǵalamaýy saldarynan turǵyn úılerdiń retsiz salynýy oryn alǵan. Munda jalpy 463 ýchastok bolsa, sonyń 153-inde qurylys júrip jatyr. Oblys ákimi A. Batalov az ýaqyttyń ishinde 3-bólimshe kóshelerin retke keltirýdi qatań tapsyrdy. Jańa kelbettegi kireberis arkanyń ornalasatyn ornyn da belgilep berdi.
«Ǵaryshker» shaǵyn aýdanyndaǵy 15, 16, 17 turǵyn úılerdiń aýlasyndaǵy balalar alańynyń jańartylǵan keıpin kórip, turǵyndarmen áńgimelesti. Oryndyqtardyń, ýrnalardyń, balalardyń oıyn karýselderiniń, jalpy aýlanyń abattandyrylýy sapasyz jasalǵanyn synǵa alǵan ákim jumystardy qaıta júrgizýdi tapsyrdy.
Sonymen qatar Ortalyq saıabaqtaǵy, qalalyq baseın aýmaǵyndaǵy qurylys jumystaryn kórdi. Qalany gazdandyrý barysymen tanysty. İstiń qarqyny kóńil tolarlyq emes ekenin atap aıtty. Qorytyndysynda qaladaǵy barlyq qurylys nysandaryna, kórkeıtý, abattandyrý, gazdandyrý jumysyna baqylaý júrgizý úshin birinshi orynbarasy L. Turlashov pen qala basshylyǵyna ár senbi saıyn qalany aralap, jumystyń kestege saı, ári sapaly jasalyp jatqanyn qadaǵalap otyrýdy tapsyrdy.
Almaty oblysy ákimdiginiń baspasóz qyzmeti
