Taldyqorǵan qalasynyń turǵyny Almaty oblysynyń eks-ákimi Amandyq Batalovtan 2012 jyly nekesiz bala tapqanyn málimdedi. Alaida burynǵy sheneýnik balasyn áli kúnge deiin moiyndamai, tipti belgisiz bir adamdar qorqytyp-úrkitip júrgen kórinedi, - dep habarlaidy Dalanews.kz NEGE saityna silteme jasap.
Amandyq Batalovtan nekesiz bala taptym degen Qarlyǵash (óz ótinishimen esimi ózgertildi – red.) buǵan deiin otandyq telearnalardyń birindegi tok-shoýǵa shyqpaq bolǵan eken. Biraq áldebir qudiretti kúsh telearnaǵa qysym jasap, túsirilimdi toqtatyp tastapty.
Onyń sózinshe, Qarlyǵash Batalovpen 2011 jyly tanysqan. Ol kezde oblys ákiminiń birinshi orynbasary bolǵan.
"Meni kórip, bireý arqyly telefon nómirimdi aldyryp, qaita-qaita telefon soqty. Men ol kezde ajyrasqan edim, eki kishkentai balamen qalǵam. Jumyssyzbyn. Balalarym kishkentai edi. Sol kezde «tanysaiyq, kezdeseiik» dep ol kisi kezdesýge shaqyrdy. Kelistim. Júrgizýshisi kelip, meni alyp ketti. «Kazahstanskaia» kóshesinde úii bolǵan, sol páterine bardyq. Sóilestik, jaqyn tanystyq. Ol kisi maǵan óte jaqsy adam bop kórindi. Meniń ómirbaianymdy surady. Áke-sheshem joq ekenin, eki balamen kúieýim tastap ketkenin, bireýdiń úiin jinap, dárethanasyn tazalap kúneltetinimdi, tek tamaqqa ǵana aqsha tabatynymdy, páter aqysyn tólei almai júregimdi aittyp, jyladym. Ol kisi maǵan «sen ýaiymdama, men saǵan kómektesemin» dedi", - deidi Qarlyǵash.
Keiin Qarlyǵash Batalovpen jaqyn qarym-qatynasta bolǵan.
"Ol kisiden qyzyma aiaǵym aýyr bop qaldy. Shynymdy aitsam, ol kisige aitpai, balany aldyryp tastasam ba degen oi boldy. Óitkeni ol – úlken kisi, al men jaspyn. Aiaǵym aýyr ekenin aitsam qalai bolady, týǵan-týys, el-jurt ne deidi dep qoryqtym. Sóitip alty jarym aiǵa deiin júrip qaldym. Keiin balany aldyrýǵa barǵanymda ol jerdegilerdiń «balany kesip-kesip soiyp alamyz» degenin estip, jylap shyǵyp kettim.
Sol kezderde páter aqysyn tóleýim kerek boldy da, telefonymdy satyp, eki-úsh ai telefonsyz júrip qaldym. Keiin qyzymdy aman-esen bosanyp, jórgekaqysyna telefon satyp aldym. Sol kezde Amandyq Ǵabbasuly «seniń nómirińdi ázer taptym» dep telefon soqty. Ol kisige «sizge siýrprizim bar» dep edim, úndemei qaldy, birden túsindi. «Qyz týdym» dedim. «Men qazir Almatydamyn, jaqyn arada kelemin, kezdeseiik» dedi ol kisi. «Jaqsy» dedim. Biraq sodan keiin maǵan múldem habarlaspady", - deidi Qarlyǵash.
Keiinnen Qarlyǵashqa qoqan-loqy kórsetile bastapty.
"Qyzym bes-alty ailyq bolǵan kezde ol kisige sýretterin jiberetinmin. Eshteńe aitpaimyn, tek sýretter ǵana jiberem. Ol kisi kóredi, biraq jaýap bermeidi. Keiin ol kisige jazyp, «qyzyma tegińizdi berińiz, qaita-qaita kómek surata bermeńiz» dedim. Sol kezden bastap túrli qoqan-loqqy bastaldy.
2018 jyly bireýler telefon soǵyp: «Siz meni tyńdańyz, budan bylai bizdiń kókemizge habarlasatyn bolsańyz, balańyzdyń aiaq-qolyn syndyryp, órtep ketemiz», – dedi. Balam esiktiń aldynda oinap júrgen, qatty qoryqtym. Júgirip balkonǵa shyǵyp, aiqailap balamdy shaqyra bastadym.
Sol kezde jańaǵy adam ekinshi ret telefon soqty da, kúlip turyp: «Ne, qorqyp kettiń be? Bul saǵan alǵashqy jáne sońǵy eskertý! Endi kókemizdi mazalaityn bolsań, seniń da qol-aiaǵyńdy syndyryp, qalanyń syrtyna aparyp kómip ketemiz, seni eshkim taba almai qalady. Uqtyń ba?! – dedi óktem daýyspen. Balamdy alyp kete me dep «uqtym» dedim. «Uqtyń ba?! Uqtyń ba?!» dep tórt-bes ret surady. «Uqtym, uqtym» dei berdim...", - deidi ol.
